ओखलढुंगाको भदौरेमा दम्पतीको विभत्स हत्या, अनुसन्धान जारी

पौष १५, सोलुखुम्बु । ओखलढुंगाको चिशंखुगढी गाउँपालिका–६ भदौरेमा एक दम्पतीको हत्या गरिएको अवस्थामा शव फेला परेको छ । मृतक स्थानीय शोभित थापा मगर र उनकी श्रीमती रत्नमाया थापा मगर रहेको प्रहरीले जनाएको छ । स्थानीयका अनुसार उनीहरूले सञ्चालन गर्दै आएको पसल बिहान अबेरसम्म नखुलेपछि छिमेकीहरूले खोजी सुरु गरेका थिए।

खोजीका क्रममा घर बाहिर शंकास्पद अवस्था देखिएपछि हेर्दा दुवै जनाको शव फेला परेको हो । प्रहरीका अनुसार हत्या पछि शवलाई घर नजिकैको स्थानमा लुकाइएको अवस्थामा भेटिएको थियो । घटनास्थल तथा आसपासको क्षेत्रमा शंकास्पद चिन्हहरू देखिएका छन् ।

घटनाको जानकारी पाउनासाथ निशंखे प्रहरी चौकीको टोली घटनास्थलमा पुगेको छ भने जिल्ला प्रहरी कार्यालयबाट थप सुरक्षाकर्मी तथा अनुसन्धान टोली खटाइएको छ । घटनाको कारण र संलग्न व्यक्तिबारे अनुसन्धान भइरहेको प्रहरीले जनाएको । यस घटनासम्बन्धी थप विवरण आउन बाँकी रहेको छ ।