ओखलढुंगामा मगर दम्पतिको एउटै चित्तामा दाहसंस्कार

पौष १७, सोलुखुम्बु् । ओखलढुंगाको चिशंखुगढी गाउँपालिका–६, भदौरेमा हत्या गरिएका मगर दम्पतिको बिहीबार एउटै चित्तामा दाहसंस्कार गरिएको छ। जिल्ला अस्पताल रुम्जाटारमा शव परीक्षणपछि स्थानीय घाटमा शोभितमान थापा मगर र उनकी धर्मपत्नी रत्नमाया थापा मगरको अन्त्येष्टि गरिएको हो। किराना पसल सञ्चालन गर्दै आएका मगर दम्पति मंगलबार आफ्नै घरमा मृत अवस्थामा फेला परेका थिए।

लामो समयसम्म पसल नखुलेपछि स्थानीयले खोजी गर्दा घर नजिकै शव फेला परेको थियो र त्यसपछि प्रहरीलाई खबर गरिएको थियो। घटनास्थलको अवस्था शंकास्पद देखिएपछि प्रहरीले अनुसन्धान अघि बढाएको थियो। थप अनुसन्धानका लागि धरानबाट तालिमप्राप्त कुकुरसमेत प्रयोग गरिएको थियो। अनुसन्धानपछि बुधबार साँझ शव परीक्षणका लागि अस्पताल पठाइएको थियो।

जिल्ला प्रहरी कार्यालय ओखलढुंगाका अनुसार घटनाबारे थप अनुसन्धान जारी छ। मगर दम्पतिका एक छोरा र पाँच छोरी रहेका छन्। सबै सन्तानको विवाह भइसकेको र छोरा–बुहारी काठमाडौंमा बस्ने भएकाले दम्पति मात्रै गाउँमा बस्दै आएका थिए ।