प्रतिकूल मौसमको मारमा सोलुखुम्बुको किवी खेती, उत्पादन घट्दै

पौष १८, सोलुखुम्बु । हिमाली जिल्ला सोलुखुम्बुमा व्यावसायिक रूपमा विस्तार हुँदै गएको किवी खेती यस वर्ष भने चुनौतीको घेरामा परेको छ । फुल फुल्ने र फल लाग्ने समयमा आएको प्रतिकूल मौसमका कारण जिल्लाको किवी उत्पादनमा उल्लेख्य गिरावट आएको हो ।

कृषि ज्ञान केन्द्र सोलुखुम्बुका अनुसार आर्थिक वर्ष २०८२/८३ मा जिल्लामा ८ सय ५८.४० मेट्रिक टन मात्र किवी उत्पादन भएको छ । अघिल्लो आर्थिक वर्ष २०८१/८२ मा ९ सय १०.८० मेट्रिक टन उत्पादन भएको तुलनामा यो तथ्यांक घट्दो हो । उत्पादन मात्र होइन, प्रतिहेक्टर उत्पादकत्व पनि यस वर्ष घटेर ७.४० मेट्रिक टनमा सीमित भएको छ, जुन अघिल्लो वर्ष ७.९२ मेट्रिक टन रहेको थियो ।

कृषि ज्ञान केन्द्रका सूचना अधिकारी उपेन्द्र ठाकुरका अनुसार यस वर्ष किवी फल दिने क्षेत्रफल १२३.०५ हेक्टर रहे पनि कुल खेती गरिएको क्षेत्रफल ११६ हेक्टर मात्र रहेको छ । क्षेत्रफल विस्तार भएजस्तो देखिए पनि मौसमको असन्तुलनले उत्पादनमा अपेक्षित नतिजा दिन नसकेको उहाँको भनाइ छ ।

विशेषगरी असमयको वर्षा, चिसो र हावाहुरीका कारण फूल झर्ने समस्या देखिएको कृषि ज्ञान केन्द्रले जनाएको छ । यसले किसानको लगानी र मेहनतमाथि प्रत्यक्ष असर पारेको छ । जिल्लाको विभिन्न क्षेत्रबाट उत्पादन भएको किवी स्थानीय बजार लगायत छिमेकी जिल्लामा समेत बिक्री हुने गरेको छ ।