७० वर्षपछि खुलेर “म नेपाली हुँ” भन्न पाए केशर बहादुर बुढाथोकीले

अशोक साम्पाङ, खोटाङ  । नेपालमै जन्मिए पनि नागरिकता नहुँदा आफ्नो पहिचान खुलेर व्यक्त गर्न नसक्नुभएका केशर बहादुर बुढाथोकीले झण्डै ७० वर्षपछि नेपाली नागरिकताको प्रमाणपत्र पाउनुभएको छ । खोटाङको साकेला गाउँपालिका-१ कुन्तुङ बाँझे च्यानडाँडामा जन्मिनुभएका बुढाथोकीले लामो समयपछि नागरिकता हात पार्नुभएको हो । वि.सं. २०१३ साल फागुन ७ गते जन्मिनुभएका केशर बहादुर बुढाथोकीले २०८२ साल माघ २० गते आइतबार खोटाङ जिल्ला प्रशासन कार्यालयबाट नागरिकता प्राप्त गर्नुभएको छ । प्रमुख जिल्ला अधिकारी रेखा कँडेल, सहायक प्रमुख जिल्ला अधिकारी कोपिला राई तथा कार्यालयका अन्य कर्मचारीहरूको उपस्थितिमा उहाँलाई नागरिकता उपलब्ध गराइएको हो ।

सानै उमेरमा घर छोडेर वर्षौंसम्म बाहिर बस्नुपरेकाले उहाँको नागरिकता बन्न सकेको थिएन । करिब १३ वर्षको उमेरमै घर छोड्नुपरेपछि केशर बहादुर बुढाथोकी लामो समय परिवार र जन्मथलोबाट टाढा रहनुभयो । प्रमुख जिल्ला अधिकारी रेखा कँडेलले खोटाङमा आएको छोटो समयमै यस्तो मानवीय र सराहनीय कार्य गर्न पाउँदा खुशी लागेको बताउँदै नागरिकता जस्तो आधारभूत अधिकारबाट कोही पनि वञ्चित हुन नदिन प्रशासन प्रतिबद्ध रहेको बताउनुभएको छ ।

नागरिकता नहुँदा शिक्षा, स्वास्थ्य, रोजगारी तथा पुख्र्यौली हक अधिकारबाट वञ्चित हुनुपरेको बताउँदै केशर बहादुर बुढाथोकीले नागरिकता       पाएपछि खुशीको सीमा नरहेको प्रतिक्रिया दिनुभयो । आज आएर मात्रै आफूलाई नेपाली नागरिकको रूपमा पूर्ण महसुस गरेको केशरको भनाई छ ।

झण्डै सात दशकपछि प्राप्त भएको नागरिकताले केशर बहादुर बुढाथोकीको जीवनमा नयाँ आशा र आत्मसम्मान थपेको छ भने खोटाङ प्रशासनको कार्यमा वास्तवमा नयाँ आशाको उदाहरण बनेको छ । यसैबीच, केशरका भतिज स्यामकुमार बुढाथोकीले काका करिब ५० औं वर्षपछि घर फर्किँदा परिवारमा खुशीयाली छाएको र अब पुख्र्यौली हक अधिकार पनि सुनिश्चित हुने बाटो खुलेको बताउनुहुन्छ ।