कैलाश्वरी युवा क्लबद्वारा खुल्ला पुरुष भलिबल प्रतियोगिता हुने

पौष २३, सोलुखुम्बु । कैलाश्वरी युवा क्लबले माघे संक्रान्ति तथा क्लब भवन उद्घाटनको अवसरमा साबिक वडा स्तरीय खुल्ला पुरुष भलिबल प्रतियोगिता आयोजना गर्ने भएको छ । “स्वास्थ्यका लागि खेलकुद, राष्ट्रका लागि खेलकुद” भन्ने नाराका साथ आयोजना हुन लागेको उक्त प्रतियोगिता सोलुदुधकुण्ड नगरपालिका–८ आङपाङस्थित कैलाश्वरी युवा क्लबको खेल मैदानमा माघ १, २ र ३ गतेसम्म सञ्चालन हुने आयोजकले जनाएको छ ।

प्रतियोगितामा सहभागी टोलीहरूमध्ये प्रथम हुने टोलीलाई ५० हजार रुपैयाँ, द्वितीयलाई ३० हजार रुपैयाँ, तृतीयलाई २० हजार रुपैयाँ र सान्त्वना हुने टोलीलाई १० हजार रुपैयाँ नगद पुरस्कार प्रदान गरिनेछ । साथै विजेता तथा सहभागी खेलाडीहरूलाई ट्रफी, मेडल र प्रमाणपत्रसमेत प्रदान गरिने आयोजकले जानकारी दिएको छ ।

त्यसैगरी प्रतियोगितामा उत्कृष्ट प्रदर्शन गर्ने खेलाडीहरूलाई पनि विशेष पुरस्कारको व्यवस्था गरिएको छ । सर्बोत्कृष्ट खेलाडी, उत्कृष्ट स्पाइकर, उत्कृष्ट सेटर, उत्कृष्ट ब्लकर र उत्कृष्ट डिफेन्डरलाई ट्रफी, मेडल तथा प्रमाणपत्र प्रदान गरिने क्लबले जनाएको छ । स्थानीय युवाहरूलाई खेलकुदतर्फ आकर्षित गर्दै आपसी सद्भाव र खेल भावना विकास गर्ने उद्देश्यले प्रतियोगिता आयोजना गरिएको आयोजकको भनाइ छ ।