सोलुखुम्बुमा बोलेरो दुर्घटना, ९ जना घाइते

पौष २८, सोलुखुम्बु । सोलुखुम्बुको माप्य दुधकोशी गाउँपालिका–६ घुरुन्दु नयाँपानी स्थित भित्री सडक खण्डमा बोलेरो गाडी दुर्घटना हुँदा ९ जना घाइते भएका छन् । सोमबार दिउँसो करिब १२ बजेको समयमा माप्य दुधकोशी गाउँपालिका–६ वाकुचोकबाट वडा नम्बर ७ वरोदी रोचमतर्फ जाँदै गरेको बिएडी ७७४२ नम्बरको डबल क्याप बोलेरो गाडी सडकबाट करिब १०० मिटर तल खसेर दुर्घटना भएको हो ।

दुर्घटनाको खबर प्राप्त हुनासाथ प्रहरी चौकी वाकुबाट खटिएको प्रहरी टोलीले घाइतेहरूलाई उद्धार गरी स्वास्थ्य चौकी वाकुमा ल्याई उपचार सुरु गरेको छ । गम्भीर घाइतेहरूलाई रेफरको तयारी भइरहेको प्रहरीले जनाएको छ । घाइतेमध्ये चालक माप्य दुधकोशी गाउँपालिका–५ काकु निवासी २८ वर्षीय प्रदिप राई, २८ वर्षीया कुशुम राईको बायाँ कानबाट रगत बगेको र अवस्था गम्भीर छ ।

यस्तै २७ वर्षीय बलराम राई र ३० वर्षीय देबेन्द्र राईको टाउकोमा चोट लागी शरीर नचल्ने अवस्था रहेको र दुवैको अवस्था गम्भीर रहेको छ । त्यस्तै ३१ वर्षीय सुरेश राईको बायाँ घुँडामा चोट लागी अवस्था मध्यम, १९ वर्षीय मनोज राईको बायाँ घुँडा र टाउकोमा चोट लागी अवस्था मध्यम, १७ वर्षीय सदिप राईको ढाड मुनि हिप र टाउकोमा चोट लागी अवस्था मध्यम रहेको छ।

२७ वर्षीया देविका राई र २७ वर्षीया सबिना राईको अवस्था सामान्य भई उपचारपछि डिस्चार्ज गरिएको प्रहरीले जनाएको छ । दुर्घटनाग्रस्त गाडी घटनास्थलमै रहेको र थप अनुसन्धान भइरहेको जिल्ला प्रहरी कार्यालय सोलुखुम्बुका प्रहरी निरीक्षक विकास राईले जानकारी दिनुभयो ।