सोताङमै मालपोत र नापीको कार्यालय, पालिका अध्यक्ष बस्नेतको पहल सार्थक

पौष ३०, सोलुखुम्बु । सोलुखुम्बुको सोताङ गाउँपालिकामा अब मालपोत कार्यालय र नापी कार्यालय स्थापना हुने भएको छ । पुस २८ गते बसेको मन्त्रिपरिषद् बैठकले दुवै कार्यालयको संगठन संरचना र दरबन्दी स्वीकृत गरेसँगै लामो समयदेखि प्रतीक्षित सेवा विस्तारको बाटो खुलेको हो । मन्त्रिपरिषद् बैठकका निर्णय सार्वजनिक गर्दै अन्तरिम सरकारका प्रवक्ता तथा सञ्चार तथा सूचना प्रविधिमन्त्री जगदीश खरेलले सोताङका लागि मालपोत र नापी कार्यालय स्वीकृत भएको जानकारी दिनुभएको हो ।

कार्यालय स्थापना हुने सुनिश्चित भएपछि सोताङ गाउँपालिका अध्यक्ष खिलराज बस्नेतले खुसी व्यक्त गर्दै छिटोभन्दा छिटो कार्यालय स्थापना गरी प्रभावकारी सेवा प्रवाहका लागि आवश्यक व्यवस्था मिलाइने विश्वास व्यक्त गर्नुभएको छ । उहाँका अनुसार निर्वाचनअघि जनतासामु गरिएका प्रतिबद्धताहरू अन्तिम चरणमा पुगेका छन् भने बाँकी प्रतिबद्धता पनि क्रमशः पूरा गर्दै सेवा प्रवाहमा निरन्तर लागिरहने प्रतिबद्धता व्यक्त गर्नुभयो । अध्यक्ष बस्नेतले यस महत्वपूर्ण उपलब्धिमा सहयोगी भूमिका निर्वाह गर्ने सम्बन्धित कर्मचारीहरू, सरकारका सदस्यहरू तथा सम्पूर्ण मन्त्रिपरिषद् प्रति आभार व्यक्त गर्नुभएको छ ।

साथै भविष्यमा थुलुङ दूधकोशी गाउँपालिका–८ र ९ तथा माप्य दूधकोशी गाउँपालिका–६ र ७ का नागरिकहरूले समेत यी सेवा सोताङबाटै लिन चाहेमा त्यसका लागि आवश्यक पहल गरिने विश्वाससमेत व्यक्त गर्नुभयो । लामो समयदेखि सामान्य सेवाका लागि समेत सोलुखुम्बुको दुर्गम पहाडी क्षेत्रका बासिन्दाहरू सल्लेरीसम्म लामो यात्रा गर्न बाध्य थिए ।

अब स्थानीय तहमै मालपोत र नापी सेवा उपलब्ध हुने भएपछि नागरिकको समय, खर्च र झन्झट उल्लेख्य रूपमा कम हुने अपेक्षा गरिएको छ । स्थानीय सरकारको पहल र राजनीतिक सहकार्यबाट सम्भव भएको यो उपलब्धिलाई ऐतिहासिक मानिएको छ । यसले कोशीपारी क्षेत्रको समग्र विकास, भूमि व्यवस्थापन सुधार तथा जनजीवन सहज बनाउन नयाँ ढोका खोल्ने विश्वास गरिएको छ ।