सल्लेरी च्याल्सा विद्युत कम्पनीको ३३औँ साधारण सभा सम्पन्न, उत्पादन क्षमता ४ मेगावाट पुर्याउने तयारी

पौष ३०, सोेलुखुम्बु । सल्लेरी च्याल्सा विद्युत कम्पनी लिमिटेडको ३३ औँ वार्षिक साधारण सभा सम्पन्न भएको छ । साधारण सभामा कम्पनीले आर्थिक वर्ष २०८१/०८२ मा हासिल गरेको वित्तीय नतिजा, भावी कार्यक्रम तथा सञ्चालनसम्बन्धी गतिविधिहरुको विस्तृत जानकारी गराएको छ।

कम्पनी अन्तर्गत रहेको ६०० किलोवाट क्षमताको सल्लेरी च्याल्सा जलविद्युत आयोजनामध्ये ४०० किलोवाट क्षमताको प्लान्ट करिब ३३ वर्ष र २०० किलोवाट क्षमताको प्लान्ट ११ वर्ष पुरानो रहेको जानकारी दिइएको छ। यस्तै, आयोजनाका सिभिल संरचनाहरु ३५ वर्षभन्दा बढी पुराना भए पनि नियमित तथा आवश्यक मर्मत–सम्भारका कारण हालसम्म आयोजनाले सन्तोषजनक उत्पादन दिइरहेको कम्पनीले जनाएको छ । भविष्यमा सोलुदुधकुण्ड नगरपालिका र नेपाल विद्युत प्राधिकरणको सहकार्यमा कम्पनीको व्यवसायिक दायरा विस्तार गर्दै विद्युत उत्पादन क्षमता अभिवृद्धि गरिने योजना रहेको बताइएको छ।

हाल सञ्चालनमा रहेको उत्पादन क्षमतालाई ३ देखि ४ मेगावाटसम्म विस्तार गर्ने उद्देश्यसहित विद्युत विकास विभागबाट २०८१ साल पौष २ गते सर्वेक्षण अनुमति पत्र प्राप्त भइसकेको कम्पनीले जानकारी गराएको छ। आर्थिक वर्ष २०८१/०८२ मा कम्पनीले नियमित कार्यबाहेक थप ५९ नयाँ घरधुरीमा विद्युत जडान, ३ वटा नयाँ वितरण बक्स जडान, सडक तथा ढल विस्तारका क्रममा भूमिगत तार र बक्सको मर्मत तथा व्यवस्थापन, विभिन्न स्थानमा भूमिगत तार परिवर्तन लगायतका काम सम्पन्न गरेको छ। साथै, सडक हुँदै विद्युत लाइन विस्तार गर्दा सडक क्षति नहुने गरी भूमिगत पाइप बिछ्याउने कार्य पनि गरिएको जनाइएको छ।

यसै आर्थिक वर्षदेखि नेपाल विद्युत प्राधिकरणसँगको सहमतिमा सोलुदुधकुण्ड नगरपालिका वडा नं. २ र ३ मा कम्पनीको ११ केभी लाइनबाट ट्यापिङ गरी प्राधिकरणमार्फत विद्युत वितरण सुरु गरिएको छ। विद्युत उत्पादनतर्फ हेर्दा, आर्थिक वर्ष २०८०/०८१ मा ४६ लाख १३ हजार ३ सय २० युनिट विद्युत उत्पादन भएकोमा आर्थिक वर्ष २०८१/०८२ मा ६ दशमलव ४४ प्रतिशतले कमी आई ४३ लाख १६ हजार १ सय ६० युनिटमा सीमित भएको छ। उत्पादन घट्नुको मुख्य कारण असोज महिनामा आएको निरन्तर बाढीका कारण इन्टेकमा ठूला ढुंगाहरु थुप्रिनु र ती हटाउने क्रममा कार्तिक महिनामा करिब १०–१२ दिन जलप्रवाह अवरुद्ध भई उत्पादन बन्द हुन पुगेको कम्पनीले स्पष्ट पारेको छ।

यस अवधिमा ११ लाख ७६ हजार १ सय ७९ युनिट विद्युत राष्ट्रिय प्रसारण लाइनमार्फत नेपाल विद्युत प्राधिकरणलाई बिक्री गरिएको छ।वित्तीय विवरणअनुसार, आर्थिक वर्ष २०८०/०८१ मा ६ करोड ७ लाख ८८ हजार ५ सय ३७ रुपैयाँ रहेको कम्पनीको कुल आम्दानी आर्थिक वर्ष २०८१/०८२ मा ० दशमलव ६३ प्रतिशतले वृद्धि भई ६ करोड ११ लाख ७१ हजार २ सय ८० रुपैयाँ पुगेको छ। सोही अवधिमा कम्पनीको कुल खर्च ३ करोड ६५ लाख २२ हजार ३ सय ११ रुपैयाँ रहेको छ। कर कट्टी पश्चात कम्पनीले १ करोड ९३ लाख ९१ हजार ४ सय २० रुपैयाँ खुद नाफा आर्जन गरेको छ, जुन अघिल्लो आर्थिक वर्षको तुलनामा १२ दशमलव ९ प्रतिशतले कम हो। कम्पनीको कुल शेयर पूँजी ६ करोड १४ लाख १२ हजार रुपैयाँ रहेको छ।

यसमध्ये १ करोड रुपैयाँ बराबरको साधारण शेयर र ५ करोड १४ लाख १२ हजार रुपैयाँ बराबरको अग्राधिकार शेयर रहेको छ। साधारण शेयरमा १ हजार १ सय ८ जना स्थानीय उपभोक्ताको ३४ प्रतिशत, सोलुदुधकुण्ड नगरपालिकाको ३३ प्रतिशत र नेपाल विद्युत प्राधिकरणको ३३ प्रतिशत स्वामित्व रहेको छ भने अग्राधिकार शेयर सोलुदुधकुण्ड नगरपालिका र नेपाल विद्युत प्राधिकरणको ५०÷५० प्रतिशत स्वामित्वमा रहेको छ। हालसम्म कम्पनीसँग १९ करोड ४ लाख ९८ हजार १ सय ५४ रुपैयाँ सञ्चित मुनाफा रहेको जनाइएको छ।

यसैबीच, आर्थिक वर्ष २०८०/०८१ मा सोलुखुम्बु जिल्लाबाट सबैभन्दा बढी कर बुझाएको योगदानको कदरस्वरूप करदाता सेवा कार्यालय ओखलढुंगाले राष्ट्रिय कर दिवसका अवसरमा कम्पनीलाई सम्मान गरेको जानकारी महाप्रबन्धक भोजराज तिवारीले दिनुभयो। साधारण सभामा कम्पनीका अध्यक्ष नुरु लामा शेर्पा, सोलुदुधकुण्ड नगरपालिकाका उपमेयर गान्धिमाया तामाङ, नगर प्रवक्ता फुर्वा ग्याल्जेन शेर्पा, सञ्चालक समिति सदस्यहरु तथा उपभोक्ताहरुको उल्लेख्य उपस्थिति रहेको थियो ।