थुलुङ दुधकोशी ६ र ५ जोड्ने बेलिब्रिजको अध्यक्ष राईले गरे शिलान्यास

माघ २, सोलुखुम्बु । सोलुखुम्बुको थुलुङ दुधकोशी गाउँपालिका वडा नम्बर ६ र ५ लाई जोड्ने दुधकोशी नदीमा निर्माण हुने बेलिब्रिजको बिहीबार शिलान्यास गरिएको छ । गाउँपालिका अध्यक्ष असिम राईले उक्त बेलिब्रिजको औपचारिक रूपमा शिलान्यास गर्नुभएको हो । पुल निर्माण सम्पन्न भएपछि गाउँपालिकाका वडा नम्बर ४, ५ र ९ बाह्रै महिना गाउँपालिका केन्द्र, जिल्ला सदरमुकाम तथा राजधानीसम्म सहज रूपमा जोडिने अपेक्षा गरिएको छ ।

यसले स्थानीय नागरिकको आवतजावत, सेवा–सुविधामा पहुँच तथा समग्र विकासमा महत्वपूर्ण टेवा पुग्ने विश्वास गरिएको छ । बेलिब्रिज निर्माणका लागि थुलुङ दुधकोशी गाउँपालिका र दुधकोशी हाइड्रोपावरबीच संयुक्त लगानी रहनेछ । पुल निर्माणको अनुमानित लागत १२ करोड रुपैयाँभन्दा बढी रहेको जनाइएको छ ।

यद्यपि, यो पुल हाइड्रोपावरका लागि नभई विशुद्ध रूपमा गाउँपालिकाको योजनाअनुसार कोशीपारीका नागरिकको सहजताका लागि निर्माण गरिन लागेको हो । हाइड्रोपावरले सामाजिक उत्तरदायित्व अन्तर्गत केही लगानी गर्ने जनाइएको छ । शिलान्यास कार्यक्रममा गाउँपालिका अध्यक्ष राईले निर्धारित समयमै गुणस्तरीय रूपमा पुल निर्माण सम्पन्न गर्न सबै पक्षको सहयोग आवश्यक रहेको भन्दै स्थानीयवासी तथा सरोकारवालासँग सहकार्यको आग्रह गर्नुभयो ।

कार्यक्रममा गाउँपालिका उपाध्यक्ष सविता राई, प्रवक्ता तथा वडा नम्बर ७ का अध्यक्ष भोजराज कार्की, वडा नम्बर ४ का अध्यक्ष श्यामकुमार गुरुङ, वडा नम्बर ५ का अध्यक्ष चन्द्रबहादुर राई, वडा नम्बर ९ का अध्यक्ष शनकुमार तामाङ, प्राविधिक कर्मचारी, कार्यपालिका सदस्य, निर्वाचित जनप्रतिनिधि तथा स्थानीय सरोकारवालाहरूको उल्लेखनीय उपस्थिति रहेको थियो ।