सोलुखुम्बुमा निर्वाचन सुरक्षाका लागि जनशक्ति अपुग हुने संकेत

माघ ४, सोलुखुम्बु । सोलुखुम्बुमा आगामी फागुन २१ गते हुन गइरहेको निर्वाचनका लागि आवश्यक सुरक्षाकर्मीको जनशक्ति अपुग हुने संकेत देखिएको छ । निर्वाचन सुरक्षाका लागि निर्वाचन प्रहरी आवेदन दर्ता प्रक्रिया सम्पन्न भए पनि मागअनुसार आवेदन नपरेको जिल्ला प्रहरी कार्यालय सोलुखुम्बुले जनाएको छ ।

जिल्ला प्रहरी कार्यालय सोलुखुम्बुका सूचना अधिकारी विकास राईका अनुसार निर्वाचन सुरक्षाका लागि कूल ८५१ जना निर्वाचन प्रहरी आवश्यक रहेकोमा माघ ३ गतेसम्म जम्मा ६९१ जनाले मात्र आवेदन दर्ता गराएका छन् । आवेदन दिनेहरूमध्ये १६८ जना महिला र ५२३ जना पुरुष रहेका छन् ।

क्षेत्रगत रूपमा हेर्दा इलाका प्रहरी कार्यालय नेचाबाट ९९ जना र इलाका प्रहरी कार्यालय सोताङबाट ७३ जनाले आवेदन दिएका छन् । यस्तै इलाका प्रहरी कार्यालय नाम्चेबाट भने हालसम्म २ जनाले मात्र आवेदन दर्ता गराएको जनाइएको छ, जसले दुर्गम क्षेत्रहरूमा जनशक्ति व्यवस्थापन चुनौतीपूर्ण बन्न सक्ने संकेत गरेको छ ।

यता सशस्त्र प्रहरी बल नेपाल गुल्म हेडक्वाटर सोलुखुम्बुतर्फ भने मागभन्दा बढी आवेदन परेको छ । सशस्त्र प्रहरीतर्फ ४६ जना निर्वाचन प्रहरी आवश्यक रहेकोमा हालसम्म ५२ जनाले आवेदन दिएका छन्। तीमध्ये ८ जना महिला र ४४ जना पुरुष रहेका छन् ।