कोकोमेन्दो तामाङ सेवा समाजको नव निर्मित भवन उद्घाटन

माघ ५, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ५ मा कोकोमेन्दो तामाङ सेवा समाजको नव निर्मित भवन सोमबार सोनाम ल्होसार पर्वको अवसरमा उद्घाटन गरिएको छ । वि.सं. २०७४ सालमा स्थापना भएको कोकोमेन्दो तामाङ सेवा समाजले करिब डेढ महिनाको अवधिमा निर्माण सम्पन्न गरेको उक्त भवन औपचारिक कार्यक्रमका बीच उद्घाटन गरिएको हो ।

शौचालयसहितको एक कोठे भवन निर्माणका लागि सोलुदुधकुण्ड नगरपालिका वडा नम्बर ५ बाट २ लाख ७५ हजार रुपैयाँ, देउसी–भैलो कार्यक्रमबाट संकलित २ लाख ८४ हजार ७ सय ३५ रुपैयाँ तथा गुठीका सदस्यहरूबाट प्राप्त १ लाख ८९ हजार ३५ रुपैयाँ खर्च गरिएको समाजले जनाएको छ। कुल लागत ७ लाख ४८ हजार ७ सय ७० रुपैयाँ रहेको कोकोमेन्दो तामाङ सेवा समाजका अध्यक्ष शनि तामाङले जानकारी दिनुभयो । कार्यक्रममा सोलुदुधकुण्ड नगरपालिकाकी उपमेयर गान्धिमाया तामाङले नगरपालिका भित्रका सम्पूर्ण जातजातिलाई समान सम्मानका साथ हेर्ने नीति रहेको बताउनुभयो ।

उहाँले आफ्नो संस्कार र संस्कृतिको संरक्षणमा सक्रिय समुदायहरूलाई नगरपालिका सधैं साथ दिन तयार रहेको प्रतिबद्धता व्यक्त गर्नुभयो । नेपाल तामाङ घेदुङका केन्द्रीय सदस्य सारदामाया तामाङले सोनाम ल्होसारको शुभकामना व्यक्त गर्दै समुदायका संस्कार र संस्कृति संरक्षणका लागि निर्माण गरिएका संरचनाहरू लोप हुँदै गएकोप्रति चिन्ता व्यक्त गर्नुभयो । उहाँले ‘एक थुकी सुकी, सय थुकी नदी’ भन्ने उक्ति प्रयोग गर्दै कोकोमेन्दो तामाङ सेवा समाजको प्रयासको प्रशंसा गर्नुभयो।

यस्तै, माप्य दुधकोशी गाउँपालिका वडा नम्बर ५ का वडा अध्यक्ष अविरल वाइबाले भवन निर्माणका क्रममा निकै संघर्ष गर्नुपरेको बताउँदै भवन प्लास्टरका लागि आवश्यक सहयोग गर्ने प्रतिबद्धता जनाउनुभयो । तामाङ समुदायले प्रत्येक वर्ष माघ शुक्ल प्रतिपदाका दिन मनाउने सोनाम ल्होसार यस वर्ष पनि विविध कार्यक्रमका साथ मनाइरहेका छन्।

मञ्जुश्री पात्रोअनुसार आजदेखि २८६२ औँ वर्ष सुरु भएको छ। सर्प वर्ष पूरा भई घोडा वर्ष प्रवेश गरेको अवसरमा मनाइने सोनाम ल्होसारलाई मुसा, गाई, बाघ, खरायो, ड्रागन (मेघ), सर्प, घोडा, भेडा, बाँदर, चरा, कुकुर र सुँगुर गरी १२ वर्गमा विभाजन गरिएको छ। पशुपन्छीको नामबाट वर्ष गणना गरिने भएकाले तामाङ समुदायलाई प्रकृतिपूजक समुदायका रूपमा लिने गरिन्छ । तामाङ समुदायको बाहुल्यता रहेको सोलुदुधकुण्ड नगरपालिकामा सोनाम ल्होसार पर्व विशेष उल्लासका साथ मनाइँदै आएको छ ।