सोलुखुम्बुमा परेन उम्मेदवारविरुद्ध उजुरी

माघ ८, सोलुखुम्बु । आगामी फागुन २१ गते हुने प्रतिनिधि सभा सदस्य निर्वाचनका लागि सोलुखुम्बुमा कुनै पनि उम्मेदवारविरुद्ध दाबी विरोधको उजुरी परेको छैन । जिल्ला निर्वाचन कार्यालय सोलुखुम्बुका सूचना अधिकारी नेत्र घिमिरेका अनुसार जिल्लामा १२ जनाको उम्मेदवारी दर्ता भएकोमा तोकिएको अवधिभित्र कुनै उजुरी नपरेको जानकारी दिनुभयो ।

उहाँका अनुसार उम्मेदवारी दर्तापछि निर्वाचन कानुनअनुसार उम्मेदवारविरुद्ध दाबी विरोधको समय बुधबार बिहान १० बजेदेखि अपराह्न ५ बजेसम्म तोकिएको थियो । मुख्य निर्वाचन अधिकृतको कार्यालयले जनाए अनुसार दाबी विरोध नपरेपछि निर्वाचन तालिकाअनुसार उम्मेदवारको अन्तिम नामवली प्रकाशनको प्रक्रिया अघि बढाइनेछ । माघ ९ गते उम्मेदवारलाई निर्वाचन चिन्ह प्रदान गर्ने कार्यक्रम तय गरिएको छ ।

निर्वाचनाका लागि नेपाली काँग्रेसबाट प्रकाशसिंह कार्की, नेकपा (एमाले) बाट कल्पना राई, नेकपा (माओवादी केन्द्र) बाट असिम राई रहेका छन् । त्यसैगरी राष्ट्रिय स्वतन्त्र पार्टीबाट ऋषिधन राई, राष्ट्रिय प्रजातन्त्र पार्टीबाट राजेन्द्र बस्नेत, उज्यालो नेपाल पार्टीबाट पेम्बा छिरि शेर्पा, मंगोल नेशनल अर्गनाइजेसनबाट मनकुमार गुरुङले उम्मेदवारी दर्ता गराएका छन् ।

यस्तै श्रम संस्कृति पार्टीबाट बियस राई, जनता समाजवादी पार्टी नेपालबाट ल्हाक्पा शेर्पा, मितेरी पार्टी नेपालबाट श्रीध्वज तामाङ, आम जनता पार्टीबाट गुणराज भट्टाराई तथा नेपाल मजदुर किसान पार्टीबाट कमलबहादुर मगरले पनि उम्मेदवारी मनोनयन दर्ता गराएको मुख्य निर्वाचन अधिकृत चन्द्र कुमार पोखरेलले बताउनुभयो ।