सोलुखुम्बुमा जेनजी उम्मेदवार शून्य

सबिना राई  माघ ९, सोलुखुम्बु । हिमाली जिल्ला सोलुखुम्बुबाट प्रतिनिधिसभा सदस्य निर्वाचनका लागि जेनजी उमेर समूहका कुनै पनि उम्मेदवार परेका छैनन् । आगामी फागुन २१ गते हुने निर्वाचनका लागि कुनै पनि जेनजी उमेरका उम्मेद्वार नरहेको निर्वाचन अधिकृतको कार्यालयले जनाएको छ । गत भदौ २३ र २४ गते भएको जेनजी उमेर समूहको आन्दोलनका कारण निर्वाचन हुन लागेको हो ।

नेपालको राजनितिमा पाका पुस्ताले मात्रै रजाँइ गरे अब युवाले नेतृत्व गर्नुपर्छ भन्ने जेनजी आन्दोलनको मर्म थियो भन्दा फरक नपर्ला । अझ जेनजी समूहका युवाले नेतृत्व लिनुपर्छ भन्ने आन्दोलनको माग पनि थियो । जेनजी समूह भनेको अहिले १२ देखि २८ वर्ष उमेर समूहलाई भन्ने गरिन्छ । यसरी हेर्दा आगामी फागुन २१ गते हुने प्रतिनिधिसभा सदस्य निर्वाचनमा देशभरबाट १ सय ५७ जेनजी उमेर समूहकाले उम्मेदवारी दिए पनि सोलुखुम्बुमा कुनै जेनजीको उम्मेदवारी परेको छैन् । सोलुखुम्बुमा उम्मेदवारी दिएका उम्मेद्वार २९ वर्षदेखि माथिका ६३ वर्षसम्मका रहेका छन् ।

उज्यालो नेपाल पार्टी पेम्बा छिरी शेर्पा २९ वर्षका हुन भने सबैभन्दा बढी उमेरका मंगोल नेशनल अर्गानाइजेशनका मनकुमार गुरुङ ६३ बर्षका रहेका छन् । सोलुखुम्बुमा उम्मेदवार रहेकामा नेपाली काँग्रेसबाट प्रकाशसिंह कार्की ६२ बर्षका, नेकपा (एमाले) बाट कल्पना राई ३७ बर्षकी, नेकपा (माओवादी केन्द्र) बाट असिम राई ४२ बर्षका रहेका छन् ।

त्यसैगरी राष्ट्रिय स्वतन्त्र पार्टीबाट ऋषिधन राई ४४ बर्षका, राष्ट्रिय प्रजातन्त्र पार्टीबाट राजेन्द्र बस्नेत ३७ बर्षका रहेका छन् । यस्तै श्रम संस्कृति पार्टीबाट बियस राई ४२ बर्षका, जनता समाजवादी पार्टी नेपालबाट ल्हाक्पा शेर्पा ४४ बर्षका, मितेरी पार्टी नेपालबाट श्रीध्वज तामाङ ४८ बर्षका, आम जनता पार्टीबाट गुणराज भट्टाराई ३६ बर्षका तथा नेपाल मजदुर किसान पार्टीबाट कमलबहादुर मगर ३७ बर्षका रहेका छन् ।

नेपालको संविधान २०७२ अनुसार प्रतिनिधीसभामा उम्मेदवार दिन कम्तीमा २५ वर्ष उमेर पुगेको हुनुपर्छ । त्यसैले जेनजी उमेर समूहका २५ देखि २८ वर्षका मात्रै उम्मेदवार बन्न पाउँछन् । सन १९९६ साल देखि २०१२ सम्म जन्मिएको उमेर समूह जेनजी भएपनि सन् २००० साल वा सो भन्दा अगाडि जन्मेका मात्रै उम्मेदवारका लागि योग्य हुने संविधानमा व्यवस्था रहेको छ ।