सरकारको फेरबदलले स्थानीय सरकारका विकासे कामलाई प्रभावित बनायो ः वडा अध्यक्ष शेर्पा 

जेठ २६, सोलुखुम्बु  । केन्द्र र प्रदेश सरकारको अस्थिरताले तल्लोतहका सरकारलाई समस्या हुने गरेको छ ।  केन्द्र र प्रदेश सरकारमा हुने सरकार फेरबदलले वडा तहमा विकास निर्माणका काममा बाधा हुने गरेको सोलुदुधकुण्ड नगरपालिका वडा नम्बर ६ का वडाले अध्यक्ष  फुर्वा ग्याल्जेन शेर्पाले बताउनुभएको छ ।  

उहाँले सरकारको अस्थिरताले तल्लो तहको विकास निर्माणमा विभिन्नताको बाधा अवरोध हुने भन्दै जनतासँग प्रत्यक्ष सरोकार राख्न वडा सरकारबाट प्रवाह हुने सेवा प्रवाह समयमा सम्पन्न गर्न नसकिने उल्लेख गर्नुभयो । उहाँले माथि सरकार फेरबदल हुँदा विकास निर्माणका कामको भुक्तानी लगायतमा समस्या हुने उल्लेख गर्नुभएको छ ।  

रेडियो एभरेष्टको कार्यक्रम एभरेष्ट संवादमा कुराकानी गर्ने क्रममा उहाँले वडा नम्बर ६ को विकासका लागी आफू निरन्तर खटिरहेको बताउनुभएको छ ।  उहाँले वडामा उपभोक्ता समिति मार्फत हुने कामलाई चुस्त दुरुस्त बनाउन आवश्यक समन्वय र सहकार्य गरिरहेको, कृषि क्षेत्रको विकासका लागी नागरिक हरुलाइ टनेल वितरण गरिएको, नयाँ बजार व्यवस्थापनका लागी भइरहेको काम अन्तिम चरणमा रहेको बताउनुभएको छ ।  

उहाँले स्वास्थ्य सेवालाई प्रभावकारी बनाउनका लागी गाउँघर क्लिनिकमा औषधि उपलब्ध गराउन वडा आफै काम गरिरहेको जानकारी गराउनुभएको हो । उहाँले विभिन्न टोल बस्तीहरूमा सामुदायिक संस्थाका भवन निर्माण कार्यलाई तिव्रता दिइएको उल्लेख गर्नुभयो ।

चालु आर्थिक वर्षमा वडालाई आएको बजेट कार्यान्वयन ८० प्रतिशत भएको भन्दे उहाँले बाँकी २० प्रतिशत पनि असार मसान्त भित्रमा कार्यान्वयन भइसक्ने भन्दै आगामी आर्थिक वर्षमा पुराना कामहरूलाई निरन्तरता दिइने बताउनुभएको छ ।