थुलुङ दुधकोशीमा श्रृङ्खलाबद्ध चोरी

माघ ११, सोलुखुम्बु । सोलुखुम्बुको थुलुङ दुधकोशी गाउँपालिका वडा नम्बर ७ देउसा लुची बजारस्थित किराना पसलमा श्रृङ्खलाबद्ध चोरी भएको छ । फ्रेम राज खत्रीको घरमै सञ्चालन हुने पसलको झ्याल फोडी भित्र पसलको बाकसमा राखिएको नगद ७ लाख रुपैयाँ र रिचार्ज कार्ड चोरी भएको जिल्ला प्रहरी कार्यालय सोलुखुम्बुले जनाएको छ ।

प्रहरीका अनुसार अनुसन्धानमा प्रतिवादीको घरकोठामा खानतलासी गर्दा चोरी भएको एनसेलको १२ थान १०० रुपैयाँ मूल्यको रिचार्ज कार्ड फेला पारेर बरामद गरिएको छ । प्रतिवादीको क्रिमिनल रेकर्ड अनुसार, उनी यसअघि पनि काठमाडौंमा चोरीमा संलग्न भएका खुल्न आएको छ ।

गत कार्तिक ११ मा चाबहिल मित्रपार्कस्थित पुर्णिमा बचत तथा ऋण सहकारी संस्था लिमिटेड र कार्तिक २२ मा चाबहिल गणेशस्थानस्थित शुभ विनायक बचत तथा ऋण सहकारी संस्था लिमिटेडमा चोरी गरेका थिए । ती घटनामा काठमाडौं जिल्ला अदालतले उनलाई ३ महिना ५ दिन कैद, १५ हजार रुपैयाँ जरिवाना र ४ लाख २९ हजार १८ रुपैयाँ क्षतिपूर्ति तिर्न आदेश दिएको थियो ।

तर प्रतिवादीले उक्त फैसला कार्यान्वयन नगरी फरार रहँदै श्रृङ्खलाबद्ध रूपमा चोरी गर्दै आएको पाइएको छ । प्रहरीले जनतालाई सचेत गराउँदै अन्य जिल्लाहरूमा पनि प्रतिवादीले अपराधिक गतिविधि गरेको हुन सक्ने भएकाले जानकारीका लागि सम्बन्धित कार्यालयसँग सम्पर्क गर्न अनुरोध गरेको छ ।