नेचासल्यान ५ मा आगलागी हुँदा गोठ जलेर नष्ट, पशुधनसहित ३ लाख बराबरको क्षति

माघ १६, सोलुखुम्बु । सोलुखुम्बुको नेचासल्यान गाउँपालिका वडा नम्बर ५ मुलखर्कमा आगलागी हुँदा एक गोठ जलेर पूर्ण रूपमा नष्ट भएको छ । शुक्रबार बिहान करिब ६ बजे स्थानीय ङाङसेरा शेर्पाको बाँसको चित्राले बनेको गोठमा खोले पकाउने क्रममा अचानक आगलागी भएको हो। आगलागी शुक्रबार बिहान करिब ७ बजे भएको थियो । आगो फैलिएपछि स्थानीय बासिन्दाहरूको सक्रियतामा आगलागी पूर्ण रूपमा नियन्त्रणमा लिइएको छ ।

घटनाको जानकारी प्राप्त हुनासाथ इलाका प्रहरी कार्यालय नेचाबाट प्रहरी टोली खटिएर घटनास्थलको निरीक्षण गरेको थियो । प्रहरीका अनुसार गोठमा बाँधिएको एक वटा बाख्रा जलेर मृत्यु भएको छ भने माउभैँसी र पाँडा गरी ३ वटा तथा २ वटा बाख्रा जलेर गम्भीर घाइते भएका छन् ।

यसैगरी गोठभित्र रहेका भाँडावर्तन, लत्ताकपडा लगायतका सामग्रीहरू पनि आगलागीबाट पूर्ण रूपमा जलेर नष्ट भएका छन्। । जिल्ला प्रहरी कार्यालय सोलुखुम्बुका प्रहरी निरीक्षक तथा सूचना अधिकारी विकास राईका अनुसार आगलागीबाट करिब ३ लाख रुपैयाँ बराबरको क्षति भएको प्रारम्भिक अनुमान गरिएको छ । आगलागीको कारणबारे थप अनुसन्धान भइरहेको प्रहरीले जनाएको छ ।