श्रृङ्खलाबद्ध आपराधिक घटनाविरुद्ध भदौरे वडाद्वारा प्रधानमन्त्रीलाई ज्ञापनपत्र

माघ १७, सोलुखुम्बु । ओखलढुंगाको चिशंखुगढी गाउँपालिका–६ भदौरे क्षेत्रमा पछिल्लो समय हत्या, लुटपाट तथा हिंसात्मक घटना बढ्दै गएको भन्दै वडा कार्यालयले प्रधानमन्त्रीलाई ज्ञापनपत्र बुझाएको छ । वडा अध्यक्ष बलराम कटवालद्वारा हस्ताक्षरित ज्ञापनपत्रमा कोशी प्रदेश अन्तर्गत भदौरे क्षेत्रमा अपराध नियन्त्रण हुन नसक्दा नागरिकमा भय र असुरक्षा बढेको उल्लेख छ ।

दोषीलाई तत्काल पक्राउ गरी कडा कारबाही गर्न, अस्थायी व्यारेक र चेकपोष्ट स्थापना गर्न तथा नेपाल प्रहरी र सशस्त्र प्रहरीको संयुक्त गस्ती बढाउन माग गरिएको छ । भदौरेलाई विशेष सुरक्षा जोन घोषणा गर्न, सीसी क्यामेरा र स्ट्रीट लाइट जडान गर्न तथा दीर्घकालीन सुरक्षा रणनीति लागू गर्न पनि आग्रह गरिएको छ । ज्ञापनपत्र जिल्ला प्रशासन कार्यालयमार्फत प्रधानमन्त्री तथा मन्त्रिपरिषद् कार्यालयमा पठाइएको हो ।