सोलुखुम्बुमा कुनै पनि उम्मेदवारले निर्वाचन खर्चका लागि बैंक खाता खोलेनन्

सबिना राई, माघ १९, सोलुखुम्बु । हिमाली जिल्ला सोलुखुम्बुमा आसन्न प्रतिनिधिसभा सदस्य निर्वाचनका लागि हालसम्म कुनै पनि उम्मेदवारले निर्वाचन खर्च व्यवस्थापनका लागि नयाँ बैंक खाता खोलेका छैनन् । आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै जिल्लाका १२ जना उम्मेदवारले निर्वाचन खर्चका लागि अनिवार्य रूपमा खोल्नुपर्ने बैंक खाता अहिलेसम्म नखोलेको तथा त्यसको विवरण पनि नबुझाएको जिल्ला निर्वाचन कार्यालय सोलुखुम्बुका निर्वाचन अधिकृत दिपेन्द्र राज अधिकारीले जानकारी दिनुभयो ।

निर्वाचन अधिकृत अधिकारीका अनुसार, उम्मेदवारले निर्वाचन आचारसंहिता विपरीत खर्च गरेको पाइएमा कानुनी कारबाही हुने व्यवस्था रहेको छ । निर्वाचन आचारसंहिता २०८२ को दफा १६ अनुसार उम्मेदवारले निर्वाचनसम्बन्धी सम्पूर्ण खर्च गर्नका लागि अनिवार्य रूपमा नयाँ बैंक खाता खोल्नुपर्ने प्रावधान गरिएको छ ।

उक्त आचारसंहितामा प्रतिनिधिसभा सदस्य निर्वाचनका लागि राजनीतिक दल तथा स्वतन्त्र उम्मेदवारले छुट्टाछुट्टै बैंक खाता खोली त्यसैमार्फत सम्पूर्ण निर्वाचन खर्च गर्नुपर्ने व्यवस्था स्पष्ट रूपमा उल्लेख गरिएको छ । निर्वाचन कार्यालयले समयमै बैंक खाता खोल्न र खर्च विवरण पारदर्शी रूपमा बुझाउन उम्मेदवारहरूलाई आग्रह गरेको छ ।