१२ स्वर्णसहित त्रिभुवन माविले जित्यो राष्ट्रपति रनिङ शिल्ड

सबिना राई,माघ १९, सोलुखुम्बु । खोटाङको ऐसेलुखर्क गाउँपालिकामा आयोजित स्थानीय तह स्तरीय छैटौँ राष्ट्रपति रनिङ शिल्ड प्रतियोगिता सम्पन्न भएको छ । प्रतियोगितामा त्रिभुवन माध्यमिक विद्यालय, ऐसेलुखर्कले १२ स्वर्ण, ५ रजत र १ कास्य गरी जम्मा १८ पदकसहित प्रथम स्थान हासिल गरेको छ । यस्तै जालपा माध्यमिक विद्यालय, बादेलले ५ स्वर्ण, ६ रजत र ७ कास्य गरी १८ पदक प्राप्त गर्दै द्वितीय स्थान हासिल गरेको छ भने कालिका बाल विकास माध्यमिक विद्यालय, राखाबाङ्देलले ५ स्वर्ण, ६ रजत र ४ कास्य गरी जम्मा १५ पदकसहित तृतीय स्थान प्राप्त गरेको छ ।

प्रतियोगितामा शिशु माध्यमिक विद्यालय, महेश्वरीले २ स्वर्ण, ६ रजत र १ कास्य गरी ९ पदकसहित चौथो, कालिका माध्यमिक विद्यालय, बाकाचोलले २ स्वर्ण, २ रजत र ३ कास्य गरी ७ पदकसहित पाँचौँ, सिम्ले माध्यमिक विद्यालय, जलेश्वरीले २ स्वर्ण र ५ कास्य गरी ७ पदकसहित छैटौँ स्थान हासिल गरेको छ । त्यस्तै शान्तोदय माध्यमिक विद्यालय, ज्यामिरेले २ रजत र ३ कास्य गरी ५ पदकसहित सातौँ तथा माक्पा माध्यमिक विद्यालय, माक्पाले १ रजत र १ कास्य गरी २ पदकसहित आठौँ स्थान प्राप्त गरेको छ । माघ १५ गतेदेखि १८ गतेसम्म सञ्चालन भएको प्रतियोगिता वडा नम्बर २ स्थित जालपा माध्यमिक विद्यालय, बादेलमा आयोजना गरिएको हो ।

“स्वास्थ्यका लागि खेलकुद, राष्ट्रका लागि खेलकुद” भन्ने मूल नाराका साथ सम्पन्न प्रतियोगितामा २८ विधाका खेल समावेश गरिएको थियो । गाउँपालिकाभित्रका महिला तथा पुरुषतर्फ गरी ८–८ वटा विद्यालयको सहभागिता रहेको शिक्षा शाखा अधिकृत निरकुमार बस्नेतले जानकारी दिनुभयो । खेलकुदमार्फत विद्यार्थीहरूको शारीरिक तथा मानसिक विकास, अनुशासन, नेतृत्व क्षमता र प्रतिस्पर्धी भावना अभिवृद्धि गर्ने उद्देश्यले प्रतियोगिता आयोजना गरिएको गाउँपालिकाले जनाएको छ । हरेक विधामा स्वर्ण, रजत र कास्य पदक प्राप्त गर्ने खेलाडीलाई क्रमशः नगद १५ सय, १ हजार र ५ सय रुपैयाँसहित मेडल र प्रमाणपत्र गाउँपालिका अध्यक्ष गिरेन्द्र बहादुर राई र उपाध्यक्ष राजेश कुमार राजभण्डारीले प्रदान गर्नुभएको थियो।

समग्रमा प्रथम, द्वितीय र तृतीय स्थान हासिल गर्ने विद्यालयलाई क्रमशः ११ हजार, ८ हजार र ५ हजार रुपैयाँ नगदसहित मेडल र प्रमाणपत्र वितरण गरिएको जनाइएको छ । यसै अवसरमा शैक्षिक सत्र २०८१ मा ऐसेलुखर्क गाउँपालिका अन्तर्गत एसईई तथा आधारभूत तहमा उच्च जीपीए प्राप्त गर्ने विद्यार्थीहरूलाई सम्मान गरिएको शिक्षा शाखा अधिकृत बस्नेतले जानकारी दिनुभयो ।