खुम्जुङ बजार स्थित स्टोररुममा आगलागी

सबिना राई, माघ १९, सोलुखुम्बु । सोलुखुम्बुको खुम्बु पासाङल्हामु गाउँपालिका–४ खुम्जुङ बजार स्थित स्टोररुममा आगलागी भएको छ । सोमबार दिउँसो करिब २ः५० बजे खुम्जुङ बजार निवासी नुरु शेर्पाको घरको छेउमा रहेको काठ, दाउरा, प्लाइउड तथा अन्य सरसामान राख्ने स्टोर रुममा आगलागी भएको हो ।

प्रहरीका अनुसार फुरा याङ्जी शेर्पाको छोरा अन्दाजी ८ वर्षका पेमा नुरु शेर्पा र गोपाल रसाइलीका ८ वर्षका छोरा सुसिल रसाइली खेल्ने क्रममा सलाई कोर्दा आगो लागेको प्रारम्भिक जानकारी प्राप्त भएको छ । आगलागीको सूचना दिउँसो ३ः१० बजे प्रहरी चौकी खुम्जुङमा प्राप्त हुनासाथ प्रहरी टोली घटनास्थलमा खटिएको थियो ।

प्रहरी र स्थानीयवासीको सहयोगमा करिब ४ बजे आगलागी नियन्त्रणमा लिइएको जिल्ला प्रहरी कार्यालय सोलुखुम्बुका प्रहरी निरीक्षक एवंम सूचना अधिकारी विकास राईले जानकारी दिनुभयो । उक्त आगलागीबाट कुनै मानवीय तथा चौपाया क्षति नभएको प्रहरीले जनाएको छ । थप क्षतिको विवरण आउन बाकीँ छ ।