खोटाङमा सुमो दुर्घटना, तीन जना घाइते

माघ २०, सोलुखुम्बु । खोटाङको हलेसी तुवाचुङ नगरपालिका–१ बाहुनीडाँडास्थित लाकुरीभञ्ज्याङमा सुमो दुर्घटना हुँदा तीन जना यात्रु घाइते भएका छन् । केपिलासगढी गाउँपालिका–४ बाक्सिलाबाट हलेसी हुँदै काठमाडौं जाँदै गरेको ना १ ज ८७८१ नम्बरको सुमो मध्यपहाडी लोकमार्गमा अनियन्त्रित भई सडकको भित्तातर्फ पल्टिँदा दुर्घटना भएको हो ।

दुर्घटनामा भुटान थिम्बुका ७२ वर्षीय कार्दुङ, डोटीको पुर्वीचौकी गाउँपालिका–४ सानागाउँका ३५ वर्षीय लोकराज जोशी र गोरखाको चुमनुब्री गाउँपालिका–८ का ५८ वर्षीय लोप्साङ लामा घाइते भएका छन् । जिल्ला प्रहरी कार्यालय खोटाङका डिएसपी प्रकाश बुढाथोकीका अनुसार घाइतेहरूलाई उपचारका लागि उदयपुरको जनसेवा क्लिनिक घुर्मीमा पठाइएको छ ।

भुटानी नागरिक कार्दुङको टाउकोमा र लोकराज जोशीको काँधमा भित्री चोट लागेको प्रहरीले जनाएको छ । उनीहरू हलेसीमा दर्शन गरेर फर्कने क्रममा दुर्घटनामा परेका हुन् । हाल घाइतेहरूको अवस्था सामान्य रहेको छ । सुमोमा सात जना यात्रु सवार रहेकामा चार जना सकुशल छन् । सुमो चालक सिन्धुपाल्चोकको पाँचपोखरी गाउँपालिका–७ का ३७ वर्षीय बुद्धमान श्रेष्ठलाई प्रहरीचौकी च्यास्मीटारले नियन्त्रणमा लिएको छ ।