सोलुखुम्बुमा निर्वाचन प्रहरी अभाव, ३० जना तालिममा अनुपस्थित

माघ २०, सोलुखुम्बु । हिमाली जिल्ला सोलुखुम्बुमा आगामी निर्वाचनका लागि आवश्यक निर्वाचन प्रहरीको अभाव देखिएको छ । तालिममा ३० जना निर्वाचन प्रहरी अनुपस्थित भएपछि जिल्लामा अझै पनि जनशक्ति अपुग रहेको जिल्ला प्रहरी कार्यालय सोलुखुम्बुले जनाएको छ । आगामी निर्वाचनलाई लक्षित गर्दै जिल्ला प्रहरी कार्यालय सोलुखुम्बुले निर्वाचन सुरक्षाका लागि आवश्यक जनशक्ति व्यवस्थापन गरिरहेको भए पनि पर्याप्त आवेदन नपर्दा समस्या उत्पन्न भएको हो ।

जिल्लाभरका विभिन्न मतदान केन्द्रमा खटाउन कूल ८५१ जना निर्वाचन प्रहरी आवश्यक रहेकामा ७९४ जना मात्र उपलब्ध भएका थिए । आवश्यक संख्या नपुगेपछि छिमेकी जिल्ला ओखलढुगााबाट ५७ जना निर्वाचन प्रहरी झिकाई माघ १८ गतेदेखि तालिम दिइँदै आएको जिल्ला प्रहरी कार्यालय सोलुखुम्बुका प्रहरी निरीक्षक एवंम सूचना अधिकारी विकास राईले जानकारी दिनुभयो । तर आवेदन दिएका केही नागरिक तालिम तथा परीक्षा प्रक्रियामा अनुपस्थित भएपछि अझै करिब ३० जनासम्म निर्वाचन प्रहरीको कमी देखिएको उहाँले बताउनुभयो ।

प्रहरीका अनुसार पहिलो चरणमा पुस २५ गतेदेखि माघ १ गतेसम्म निर्वाचन प्रहरीका लागि दरखास्त आह्वान गरिएको थियो । सो अवधिमा पर्याप्त आवेदन नपरेपछि माघ ३ गतेसम्म म्याद थप गरिएको थियो । त्यसपछि पनि अपेक्षित संख्या नपुगेपछि माघ १० र ११ गते तेस्रो पटक पुनः सूचना प्रकाशन गरिएको थियो ।

तीन चरणमा सूचना प्रकाशन गर्दा कुल ७९४ वटा आवेदन प्राप्त भए पनि ५७ जनाको कमी कायमै रहेको थियो । १८ देखि ५४ वर्ष उमेर समूह तोकिए पनि अपेक्षाअनुसार आवेदन नआउनु चिन्ताको विषय बनेको प्रहरी निरीक्षक राईले बताउनुभयो । जिल्ला प्रहरी कार्यालय सोलुखुम्बुले बाँकी जनशक्ति व्यवस्थापनका लागि थप पहल गरिरहेको जनाएको छ ।