सिन्धुलीमा निर्वाचन तयारी तीव्र, सुरक्षाका लागि नेपाली सेना परिचालन

माघ २१,साेलुखुम्बु ।    आगामी प्रतिनिधिसभा सदस्य निर्वाचनलाई व्यवस्थित, शान्तिपूर्ण र विश्वसनीय रूपमा सम्पन्न गर्ने तयारीस्वरूप सिन्धुली जिल्लामा नेपाली सेनाको परिचालन सुरु गरिएको छ। एकीकृत सुरक्षा योजना–२०८२ अनुसार बुधबार बिहानदेखि सेनालाई जिम्मेवारीसहित मैदानमा खटाइएको हो।

सरकारले निर्वाचनलाई लक्षित गर्दै स्वीकृत गरेको एकीकृत सुरक्षा योजना कार्यान्वयनको चरणमा प्रवेश गरिसकेको छ। निर्वाचन मिति नजिकिँदै जाँदा सुरक्षा व्यवस्थालाई थप प्रभावकारी बनाउने उद्देश्यले फागुन २१ गते हुने मतदानका लागि सिन्धुलीस्थित श्री भवानी बक्स गणबाट करिब ८ सयको संख्यामा नेपाली सेना परिचालन गरिएको गणले जनाएको छ।

योजनाअनुसार निर्वाचन सुरक्षामा बहुस्तरीय संरचना अपनाइएको छ। मतदानस्थलको भित्री व्यवस्थापन तथा सुरक्षाको जिम्मा नेपाल प्रहरी र निर्वाचन प्रहरीलाई दिइएको छ भने दोस्रो तहमा सशस्त्र प्रहरी बल खटाइनेछ। सशस्त्र प्रहरीले नेपाल प्रहरी र नेपाली सेनासँग सहकार्य गर्दै समन्वयात्मक रूपमा काम गर्ने बताइएको छ।

नेपाली सेनाले भने बाहिरी क्षेत्रमा रहँदै समग्र सुरक्षा व्यवस्थापनमा सहयोग पुर्‍याउने भूमिका निर्वाह गर्नेछ। सेनाका अनुसार सिन्धुलीका दुई निर्वाचन क्षेत्रअन्तर्गत रहेका १ सय ५१ मतदान केन्द्रमा बुधबारदेखि नै आवश्यक संख्यामा सेना परिचालन गरिएको छ।

सुरक्षा निकायहरूबीचको सहकार्य, तयारी र समन्वयले यसपटकको निर्वाचन शान्त, व्यवस्थित र नागरिकमैत्री हुने अपेक्षा गरिएको छ।