मेघालयको कोइलाखानी विस्फोटमा खोटाङका दाजुभाइको मृत्यु, १८ जनाको ज्यान गयो

सोलुखुम्बु, माघ १९ । भारतको मेघालयस्थित कोइलाखानीमा भएको विस्फोटमा परी खोटाङका दुई दाजुभाइको मृत्यु भएको छ। बिहीबार मेघालयको उम्साङघाटस्थित कोइलाखानीमा ब्लास्टिङ गर्ने क्रममा आगलागी हुँदा बराहपोखरी गाउँपालिका–१ सालघारीका २७ वर्षीय पूर्णबहादुर खपाङ्गी र उनका २४ वर्षीय भाइ सुरेन्द्र खपाङ्गीको ज्यान गएको हो ।

सोही घटनामा बराहपोखरी भञ्ज्याङका बमबहादुर खपाङ्गी, सालघारीकै कर्णबहादुर खपाङ्गी, नरबहादुर खपाङ्गी तथा उदयपुर साउनेका ललित मगर घाइते भएका छन्। घाइतेहरूको उपचार भइरहेको बताइएको छ।

उनीहरू रोजगारीका लागि गत पुस ३ गते मेघालय पुगेका थिए। पछिल्लो समय खोटाङसहित पूर्वी पहाडी जिल्लाबाट धेरै युवाहरू कामको खोजीमा मेघालय जाने गरेका छन्।

बीबीसीका अनुसार उक्त घटनामा ज्यान गुमाउनेको संख्या १८ पुगेको छ। भारतीय प्रधानमन्त्री नरेन्द्र मोदीले घटनाप्रति दुःख व्यक्त गर्दै मृतकका परिवारलाई २–२ लाख भारतीय रुपैयाँ राहत दिने घोषणा गरेका छन् । घाइतेलाई ५० हजार रुपैयाँ उपलब्ध गराइने पनि जनाइएको छ।