सोलुखुम्बुमा १ हजार ४९ किशोरीलाई एचपीभी खोप दिइने

माघ २५, सोलुखुम्बु । सोलुखुम्बु जिल्लामा पाठेघरको मुखको क्यान्सर रोकथामका लागि १ हजार ४९ जना किशोरीलाई ह्युमन पापिलोमा भाइरस (एचपीभी) विरुद्धको खोप लगाइने भएको छ । जिल्लाका एक नगरपालिका र सात गाउँपालिका गरी आठवटा स्थानीय तहमा अभियान सञ्चालन गरी खोप दिइन लागिएको हो ।

जिल्ला स्वास्थ्य कार्यालय सोलुखुम्बुका अनुसार आधारभूत तथा माध्यमिक विद्यालयमा कक्षा ६ मा अध्ययनरत किशोरी, विद्यालय बाहिर रहेका १० वर्ष उमेर समूहका किशोरी तथा गत वर्ष खोप लगाउन छुटेका ११ देखि १४ वर्ष उमेर समूहका किशोरीलाई खोप प्रदान गरिनेछ ।

स्वास्थ्य कार्यालय सोलुखुम्बुका सूचना अधिकारी राम नारायण शाहका अनुसार नेचासल्यान गाउँपालिका र सोलुदुधकुण्ड नगरपालिकामा माघ २८ गतेदेखि फागुन १ गतेसम्म खोप कार्यक्रम सञ्चालन हुनेछ । यस्तै सोताङ, महाकुलुङ, लिखुपिके, थुलुङ दुधकोशी र माप्य दुधकोशी गाउँपालिकामा फागुन ४ र ५ गते खोप दिइनेछ भने खुम्बु पासाङल्हामु गाउँपालिकामा फागुन २७ गते खोप कार्यक्रम तय गरिएको छ ।

नेपाल सरकारले देशव्यापी रूपमा पाठेघरको मुखको क्यान्सर न्यूनीकरणका लागि अभियान सञ्चालन गर्ने घोषणा गरेसँगै सोलुखुम्बु जिल्लामा पनि किशोरीहरूलाई लक्षित गरी एचपीभी खोप अभियान अघि बढाइएको हो । खोप विद्यालय तथा तोकिएका खोप केन्द्रमार्फत प्रदान गरिनेछ। अभियान सफल बनाउन महिला स्वास्थ्यकर्मी तथा महिला स्वास्थ्य स्वयंसेवक परिचालन गरिने स्वास्थ्य कार्यालयले जनाएको छ ।