सोलुखुम्बुका १२ मध्ये ५ उम्मेदवारले अझै खोलेनन् निर्वाचन खर्चको बैंक खाता

माघ २५, सोलुखुम्बु । सोलुखुम्बुमा हुने प्रतिनिधिसभा सदस्य निर्वाचनका लागि उम्मेदवारी दिएका १२ जनामध्ये आइतबारसम्म ७ जनाले मात्र निर्वाचन खर्चका लागि अनिवार्य नयाँ बैंक खाता खोलेका छन्। बाँकी ५ जना उम्मेदवारले हालसम्म बैंक खाता खोलेर विवरण बुझाएका छैनन्। नयाँ बैंक खाता खोल्ने दल तथा उम्मेदवारमा राष्ट्रिय प्रजातन्त्र पार्टी, आम जनता पार्टी, जनता समाज पार्टी नेपाल, राष्ट्रिय स्वतन्त्र पार्टी, नेपाल मजदुर किसान पार्टी, मितेरी पार्टी नेपाल र नेपाी कम्युनिष्ट पार्टी रहेका छन्।

तर नेपाली कांग्रेस, नेकपा एमाले, मंगोल नेशनल अर्गानाइजेशन, श्रम संस्कृति पार्टी र उज्यालो नेपाल पार्टीका उम्मेदवारले हालसम्म नयाँ बैंक खाता नखोलेको जिल्ला निर्वाचन कार्यालयले जनाएको छ। आगामी फागुन २१ गते हुने प्रतिनिधिसभा सदस्य निर्वाचनका लागि निर्वाचन आचारसंहिता २०८२ को दफा १६ अनुसार उम्मेदवारले निर्वाचनसम्बन्धी सम्पूर्ण खर्चका लागि अनिवार्य रूपमा छुट्टै नयाँ बैंक खाता खोल्नुपर्ने व्यवस्था छ।

जिल्ला निर्वाचन कार्यालय सोलुखुम्बुका सूचना अधिकारी नेत्र घिमिरेका अनुसार आचारसंहिता अनुसार खाता नखोल्ने तथा विवरण नबुझाउने उम्मेदवारलाई पत्राचार गरिने र त्यसपछि पनि अटेर गरेमा कारबाहीका लागि निर्वाचन आयोगमा सिफारिस गरिनेछ। सोलुखुम्बु जिल्ला प्रतिनिधिसभा सदस्य निर्वाचनका लागि एक मात्र निर्वाचन क्षेत्र रहेको जिल्ला हो। यस जिल्लामा कुल ८५ हजार ५ सय १५ जना मतदाता रहेका छन्। निर्वाचनका लागि जिल्लाभर १ सय २४ वटा मतदान स्थल र १ सय ३९ वटा मतदान केन्द्र तोकिएका छन्।