भदौरेका राई दम्पती हत्यामा संलग्न हत्यारा ओखलढुंगा प्रहरीद्वारा सार्वजनिक

माघ २५, सोलुखुम्बु । ओखलढुंगाको चिशंखुगढी गाउँपालिका–६ भदौरेस्थित बोहोरे टोलमा वृद्ध दम्पती चन्द्र विक्रम राई र उनकी श्रीमती चन्द्रमाया राईको लुटपाटपछि हत्या गरिएको घटनामा संलग्न दुई दाजुभाइलाई प्रहरीले पक्राउ गरी सार्वजनिक गरेको छ । जिल्ला प्रहरी कार्यालय ओखलढुंगाका सूचना अधिकारी तथा प्रहरी निरीक्षक विक्रम भट्टराईका अनुसार दाजु धनबहादुर राना मगरलाई आइतबार सार्वजनिक गरिएको छ भने १७ वर्षीय भाइ नाबालक भएकाले उनको परिचय गोप्य राखिएको हो ।

ओखलढुंगा प्रहरीका अनुसार प्रारम्भिक अनुसन्धानबाट भदौरेकै स्थानीय दुई दाजुभाइ उक्त घटनामा संलग्न रहेको पुष्टि भएपछि उनीहरूलाई काठमाडौंको डल्लु क्षेत्रबाट पक्राउ गरिएको थियो । घटनामा प्रयोग भएको हातहतियारसमेत प्रहरीले बरामद गरेको जनाएको छ । भदौरे क्षेत्र पछिल्लो समय श्रृंखलाबद्ध हत्या घटनाका कारण चिन्ताको केन्द्र बन्दै गएको छ। यसअघि करिब डेढ महिनाअघि सोही क्षेत्रमा शोभितमान थापामगर र उनकी श्रीमती रत्नमाया थापामगरको पनि लुटपाटपछि हत्या भएको थियो ।

प्रहरी अनुसन्धान अनुसार दुवै घटनामा लुटपाटपछि हत्या गरिएको समान प्रकृतिको शैली देखिएको छ । मृतक मगर दम्पती र राई दम्पती दुवैले गाउँमा साना किराना पसल सञ्चालन गर्दै आएका थिए । लगातारका हत्या घटनाले ओखलढुंगाबासीमा गहिरो त्रास सिर्जना गरेको छ । जिल्लाका राजनीतिक दल, नागरिक समाज तथा सरोकारवालाहरूले दोषीलाई छिटोभन्दा छिटो पक्राउ गरी कडा कारबाही गर्न र ग्रामीण क्षेत्रमा सुरक्षा व्यवस्था थप मजबुत बनाउन माग गरेका छन् ।