ताप्ली गाउँपालिकामा एचपिभी खोप अभियान सुरु, पहिलो दिन ५५ किशोरीलाई खोप

माघ २७, ठविन्द्र मगर, उदयपुर । उदयपुरको ताप्ली गाउँपालिकामा किशोरीहरूमा पाठेघरको क्यान्सर रोकथाम गर्ने उद्देश्यले एचपिभी खोप अभियान सुरु गरिएको छ। राष्ट्रिय खोप अभियानअन्तर्गत माघ २७ गतेदेखि सुरु भएको यस अभियानको पहिलो दिन ५५ जना किशोरीलाई खोप लगाइएको हो। ताप्ली गाउँपालिकाका पाँचवटै वडामा रहेका माध्यमिक तथा आधारभूत विद्यालयमा अध्ययनरत कक्षा ६ का विद्यार्थीहरू र विद्यालय बाहिर रहेका १० वर्ष उमेर समूहका किशोरीहरूलाई लक्षित गरी खोप अभियान सञ्चालन गरिएको हो।

विद्यालयमा अध्ययनरत किशोरीहरूलाई विद्यालयमै र विद्यालय बाहिर रहेका किशोरीहरूलाई खोप केन्द्र तथा स्वास्थ्य संस्थामार्फत एचपिभी खोप लगाइएको स्वास्थ्य शाखा प्रमुख राजेश दनुवारले जानकारी दिनुभयो। खोप सञ्चालनअघि पालिकास्तरीय तथा वडास्तरीय खोप समिति, विद्यालयका शिक्षक तथा विद्यार्थीहरूलाई एचपिभी खोपसम्बन्धी अभिमुखीकरण गरी जनचेतना फैलाइएको थियो।

पहिलो दिन कक्षा ६ का ५३ जना, कक्षा ७ मा गत वर्ष खोप छुटेका १ जना र विद्यालय बाहिर रहेका १ जना गरी जम्मा ५५ जना किशोरीहरूले खोप लगाएका छन्। खोप अभियान सफल बनाउन स्वास्थ्य चौकीका स्वास्थ्यकर्मी, विद्यालयका शिक्षक–शिक्षिकाहरू तथा महिला स्वास्थ्य स्वयंसेविकाहरूको महत्वपूर्ण भूमिका रहेको स्वास्थ्य शाखाले जनाएको छ। साथै आगामी दिनहरूमा पनि निरन्तर समन्वय, सहयोग र सहकार्य रहने विश्वास व्यक्त गर्दै स्वास्थ्य शाखा प्रमुख दनुवारले सबैलाई धन्यवाद दिनुभएको छ।