सोलुखुम्बुका उम्मेदवार घरदैलोमा व्यस्त

माघ २८, सोलुखुम्बु । प्रतिनिधिसभा सदस्य निर्वाचनको मिति नजिकिएसँगै सोलुखुम्बुका उम्मेदवार घरदैलोमा व्यस्त छन् । जिल्लाका १२ जना उम्मेदवार चुनावी प्रतिस्पर्धामा छन् । नेपाली कांग्रेस, नेपाल कम्युनिष्ट पार्टी (एमाले), नेपाली कम्युनिष्ट पार्टी (नेकपा), राष्ट्रिय स्वतन्त्र पार्टी (रास्वपा) सहित १२ दलका उम्मेदवार घरदैलो अभियानमा सक्रिय भएका छन् ।

नेपाली कांग्रेसका प्रकाशसिंह कार्की, नेपाली कम्युनिस्ट पार्टीका असीम राई र नेकपा एमालेका कल्पना राई, राष्ट्रिय स्वतन्त्र पार्टीका ऋषिधन राई, उज्यालो नेपाल पार्टीका पेम्बाछिरि शेर्पा, मंगोल नेशनल अर्गनाइजेसनका मनकुमार गुरुङ, राष्ट्रिय प्रजातन्त्र पार्टीका राजेन्द्र बस्नेत कार्यकर्तासहित घरदैलोमा छन् ।

यस्तै श्रम संस्कृति पार्टीका बीएस राई, जनता समाजवादी पार्टी नेपालका ल्हाक्पा शेर्पा, मितेरी पार्टी नेपालका श्रीध्वज तामाङ, मंगोल नेशनल अर्गनाईजेसनका मनकुमार गुरुङ, आम जनता पार्टीका गुणराज भट्टराई र नेपाल मजदुर किसान पार्टीका कमलबहादुर मगर मत माग्न गाउँबस्तीमा छन् । उम्मेदवारहरूले विकास निर्माण, रोजगारी, शिक्षा, स्वास्थ्य, सडक पूर्वाधार र पर्यटन प्रवद्र्धनलाई मुख्य एजेन्डाका रूपमा अघि सारेका छन् । निर्वाचन नजिकिँदै जाँदा चुनावी माहोल थप तात्ने देखिएको छ ।