माघ २८, सोलुखुम्बु । ओखलढुंगाको सिद्धिचरण नगरपालिका–२ ठुलाछापमा आयोजना गरिएको एक दिने निःशुल्क स्वास्थ्य जाँच शिविरबाट १५० भन्दा बढी स्थानीय नागरिक लाभान्वित भएका छन्। वडा कार्यालयको समन्वय तथा उज्यालो युथ नेटवर्क र उज्यालो गुप्त रोग स्वास्थ्य सेवा केन्द्र, उर्लाबारी–७ मोरङको सहयोगमा २८ गते वडा कार्यालय परिसरमा शिविर सञ्चालन गरिएको हो।
शिविरमा ७९ जनाको विस्तृत स्वास्थ्य परीक्षण गरिएको थियो भने ३७ जनालाई सामान्य औषधि उपचार प्रदान गरिएको जनाइएको छ। त्यस्तै २९ जनालाई आवश्यक चेकजाँच तथा स्वास्थ्यसम्बन्धी परामर्श दिइएको थियो भने १३ जनाको अप्रेसन सेवा प्रदान गरिएको आयोजकले जानकारी दिएका छन्। स्थानीय बासिन्दालाई घरआँगनमै स्वास्थ्य सेवा उपलब्ध गराउने उद्देश्यले आयोजना गरिएको शिविरले दुर्गम क्षेत्रका नागरिकलाई ठूलो राहत पुगेको जनाइएको छ।
शिविरमा उज्यालो गुप्त रोग स्वास्थ्य सेवा केन्द्रले पुर्याएको योगदानको उच्च मूल्याङ्कन गर्दै वडा अध्यक्ष बसन्त कटवालले धन्यवाद व्यक्त गर्नुभएको छ। उहाँले यस्ता सामाजिक सेवामूलक कार्यक्रमले समुदायमा सकारात्मक प्रभाव पार्ने विश्वास व्यक्त गर्नुभयो।
Discussion about this post