हिमाली क्षेत्रको अवस्था बुझ्न प्रधानमन्त्री कार्की सोलुमा, चुनावमा असर नपर्ने प्रजिअको विफ्रीङ

माघ २९, सोलुखुम्बु । हिमाली क्षेत्रको बस्तुस्थीति बुझ्न प्रधानमन्त्री शुसिला कार्की सोलुखुम्बु आइपुग्नुभएको छ । चुनावी सरगर्मी बढीरहेका बेला यहाँ आगामी फागुन २१ मा हुने निर्वाचनको माहौल बुझ्न आज विहान प्रधानमन्त्री कार्की हेलिकप्टर मार्फत नाम्चे आउनुभएको हो । प्रधानमन्त्री कार्कीसँगै उनका प्रमुख स्वकीय सचिव आदर्शकुमार श्रेष्ठ र प्रेस सल्लाहकार रामबहादुर रावलसहितको टोली आज बिहान सोलुखुम्बु आइपुगेको ।

हेलिकप्टरबाट सुरुमा नाम्चे पुगेको प्रधानमन्त्री कार्कीसहितको टोली अहिले सदरमुकाम सल्लेरी पुगेको छ । प्रधानमन्त्री कार्कीलाई प्रमुख जिल्ला अधिकारी लिला कृसी पाण्डे, मुख्य निर्वाचन अधिकृत चन्द्र कुमार पोखरेल, सुरक्षा अंगका जिल्ला प्रमुखहरु प्रहरी नायव उपरिक्षक मनोजित कुँवर, जिल्ला समन्वय समिति सोलुखुम्बुका प्रमुख कृष्ण प्रसाद निरौलाले स्वागत गर्नुभयो ।

जिल्लको माथिले क्षेत्रमा चुनावको समयमा हिमपात हुन सक्ने सम्भावनालाई मध्येनजर गर्दै त्यसको अवस्था बुझ्न आएको प्रधानमन्त्रीको टोलीले समस्या नहुने निष्कर्ष निकालेको जनाइएको छ । प्रधानमन्त्रीका प्रेस सल्लाहकार रावलका अनुसार अहिलेसम्मको अवस्था हेर्दा फागुन २१ गतेको निर्वाचन गराउन समस्या नहुने ब्रिफिङ जिल्लाका अधिकारीहरुले गरेका छन् ।

जिल्लामा १२३ मतदान स्थल छन् । यदि हिउँ परिहालेमा सातवटा मतदान स्थल प्रभावित हुनेछन् । ती सातमध्ये चार वटा मतदान स्थल नाम्चेभन्दा माथि पर्दछन् । अहिलेसम्म ती मतदान स्थल सामान्य अवस्थामा छन् । प्रधानमन्त्रीका प्रेस सल्लाहकार रावलका अनुसार आज र भोलि पूर्वी क्षेत्रका हिमाली जिल्लाको अवस्था बुझेर पश्चिम जाने योजना छ ।