प्रधानाध्यापकमाथि अभद्र व्यवहार र हातपातको प्रयासको आरोपपछि चेपेल आधारभूत विद्यालय बन्द

असाेज १५,  सोलुखुम्बु । सोलुखुम्बुको सोताङ गाउँपालिका–२ चेपेलस्थित श्री चेपेल आधारभूत विद्यालयले विद्यालयमा शिक्षक, विद्यार्थी तथा विद्यालय व्यवस्थापनसँग सम्बन्धित व्यक्तिमाथि अभद्र व्यवहार भएको भन्दै विद्यालयको सम्पूर्ण कामकाज तथा पठनपाठन बन्द गरेको जनाएको छ।

विद्यालयले २०८३ असोज १५ गते जारी गरेको सूचनाअनुसार, असोज १४ गते बसेको विद्यालय व्यवस्थापन समिति र शिक्षक–अभिभावक संघको संयुक्त बैठकले विद्यालय परिसरभित्र जङ्क फुड (पत्रु खाना) निषेध गर्ने निर्णय गरेको थियो।

सोही विषयलाई लिएर सोताङ–२ चेपेल निवासी तथा विद्यालय छात्रावास सञ्चालक पेमा शेर्पाले विद्यालयका शिक्षक, विद्यार्थी, विद्यालय व्यवस्थापन समिति तथा शिक्षक–अभिभावक संघका सदस्यहरूमाथि अपशब्द प्रयोग गर्दै अमर्यादित व्यवहार गरेको विद्यालयको आरोप छ।

विद्यालयले जारी गरेको पत्रमा प्रधानाध्यापक बासु राईमाथि समेत अपशब्द प्रयोग गरी अमर्यादित व्यवहार गर्नुका साथै कुटपिट गर्ने नियतले हातपात गरेको उल्लेख गरिएको छ।

घटनापछि विद्यालयमा शिक्षक तथा विद्यार्थीका लागि सुरक्षित वातावरण नरहेको महसुस भएकाले सम्बन्धित निकायमार्फत पेमा शेर्पालाई उपस्थित गराई घटनाबारे जवाफ लिन तथा कानुनी कारबाहीको प्रक्रिया अघि बढाउन माग गरिएको विद्यालयले जनाएको छ।

विद्यालयले शिक्षक तथा विद्यार्थीको पूर्ण सुरक्षाको वातावरण सुनिश्चित नभएसम्म विद्यालयको सम्पूर्ण कामकाज तथा पठनपाठन बन्द रहने जानकारी गराएको छ।

विद्यालयले उक्त जानकारी सोताङ गाउँपालिका वडा नं. २ को कार्यालय, सोताङ गाउँपालिका शिक्षा शाखा र शिक्षा विकास तथा समन्वय इकाइ सोलुखुम्बुलाई समेत बोधार्थ पठाएको छ।