सोलु ल्याउँदै गरेको अवैध ३६ लाखकाे कपडा प्रहरीको फन्दामा, मालिक खोज्दै प्रहरी 

माघ ४, सोलुखुम्बु ।  काठमाण्डौबाट सोलुखुम्बु ल्याउँदै गरेको ३६ लाख बढीको अवैध फेन्सी सामान सिन्धुली प्रहरीले जफत गरेको छ । प्रदेश ०१–०३० च ७२२० नम्बरको डबल क्याप बोलेरोमा लुकाइ छिपाई ल्याउँदै गरिएको सामान इलाका प्रहरी कार्यालय खुर्कोटको टोलीको फन्दामा परेको हो । चेकजाँचका क्रममा प्रहरीले बोरा भित्र लुकाइएको अवस्थामा सामान फेला पारेको थियो ।  जफत गरिएको सामान, गाडी सहित चालक प्रेम बहादुर सार्कीलाई प्रहरीले राजस्व अनुसन्धान कार्यालय पथलैया पठाएको छ ।

 यद्यपी उक्त सामानको धनी को हा भन्ने बारेमा खोज अनुसन्धान समेत भइरहेको प्रहरीको भनाई छ ।  प्रहरीले प्रतिगोटा १५ सय पर्ने ८१ पिस काेलम्वीया ज्याकेट १ लाख २१ हजारको बरामद गरेको छ ।  यस्तै प्रतिगोटा १८ सय पर्ने ८७ पिस फेसन स्पट ज्याकेट १ लाख ५६ हजार बराबरको बरामद गरेको छ । यस्तै करिव ५ लाख मूल्य बराबरको ४ सय ८९ पिस ट्र्याक, करिव ११ हजारको लेडिज ट्राउजर, र २ लाख ३५ हजार मुल्य बराबरको ९ सय थान जेन्टस ट्राउजर समेत बरामद गरिएको जिल्ला प्रहरी कार्यालय सिन्धुलीले जनाएको छ ।  प्रहरीले १० लाख बढीको सामान र २६ लाख पर्ने बोलेरो क्याप बलेराे सहित बरामद गरेको हो ।