फागुन ५, सोलुखुम्बु । सोलुखुम्बुको सोलुदुधकुण्ड नगरपालिकाले परम्परागत रूपमा पाल टाँगेर चौरी पालन गर्दै आएका किसानहरूलाई हाल गोठ व्यवस्थापन गरिदिएको छ । उच्च हिमाली क्षेत्रमा आधारित चौरी व्यवसायलाई व्यवस्थित र दिगो बनाउन स्थानीय सरकारले विभिन्न कार्यक्रम सञ्चालन गरिरहेको सोलुुदुधकुण्ड नगरपालिकाका पशु सेवा प्राविधिक गणेश थापाले बताउनुभयो ।
उहाँका अनुसार आर्थिक वर्ष २०८१.०८२ को तथ्यांकअनुसार नगरपालिका भित्र ३ सय ७७ वटा नाक, याक तथा १ हजार ५६ वटा चौरी/जोक्पे रहेका छन् । यी पशुहरू यहाँको दुग्ध उत्पादन, घ्यू, छुर्पी तथा स्थानीय अर्थतन्त्रका प्रमुख आधार मानिन्छन् । पशु सेवा प्राविधिक थापाका अनुसार चौरी व्यवसायलाई अझ प्रभावकारी र दिगो बनाउन सामुदायिक वनमा चौरी चरणका लागि एकरूप मूल्य निर्धारण गर्न आवश्यक रहेको छ । हाल विभिन्न सामुदायिक वन उपभोक्ता समूहले फरकफरक शुल्क लिँदा किसानहरू मारमा परिरहेका छन् ।
एकरूप नीति नहुँदा व्यवसाय सञ्चालनमा कठिनाइ थपिएको उहाँले बताउनुभयो । उहाँका अनुसार यदि सरकार तथा सम्बन्धित निकायले समयमै आवश्यक ध्यान नदिएमा चौरीको अस्तित्व नै संकटमा पर्न सक्ने खतरा रहेको छ । पछिल्लो समय युवापुस्ता वैदेशिक रोजगारीतर्फ आकर्षित भइरहेका कारण परम्परागत चौरी पालन व्यवसायमा जनशक्ति अभाव देखिन थालेको छ । नगरपालिकाले गोठ सुधार, पशु स्वास्थ्य सेवा, खोप कार्यक्रम तथा प्राविधिक परामर्शजस्ता सहयोगमार्फत किसानलाई व्यवसायमा टिकाइराख्न प्रयास गरिरहेको जनाएको छ ।
साथै, युवाहरूलाई चौरी पालनतर्फ आकर्षित गर्न अनुदान, सहुलियत कर्जा तथा तालिम कार्यक्रम आवश्यक रहेको सरोकारवालाहरूले बताएका छन् । स्थानीय सरकारले संघ र प्रदेश सरकारसँग समन्वय गरी चौरी व्यवसाय संरक्षण तथा प्रवद्र्धनका लागि दीर्घकालीन नीति निर्माण गर्नुपर्ने आवश्यकता औंल्याइएको छ ।
Discussion about this post