गंगोदय माविको ७०औँ वार्षिकोत्सव तथा अक्षयकोष पुरस्कार वितरण कार्यक्रम

फागुन ८, सोलुखुम्बु । खोटाङको रावा बेसी गाउँपालिका–५, दुवेकोलस्थित गंगोदय माध्यमिक विद्यालयको ७०औँ वार्षिकोत्सव तथा अक्षयकोष पुरस्कार वितरण कार्यक्रम सम्पन्न भएको छ । बिहीबार विभिन्न कार्यक्रमका साथ उक्त कार्यक्रम सम्पन्न भएको हो । विद्यालय व्यवस्थापन समितिका अध्यक्ष तेजबहादुर राईको सभापतित्व तथा गाउँपालिका अध्यक्ष फटिककुमार श्रेष्ठको प्रमुख आतिथ्यमा कार्यक्रम सम्पन्न भएको हो ।

कार्यक्रमअन्तर्गत आयोजित आधारभूत तह (कक्षा १–३) स्तरीय बेलुन फुटाइ प्रतियोगितामा कालिका आधारभूत विद्यालय, चिण्डे भदौरेकी मुना विक प्रथम, मनिषा नेपाली द्वितीय र गंगोदय माविकी आकृति गुरुङ तृतीय भएकी थिइन् । कक्षा ४–५ स्तरीय हिसाब दौड प्रतियोगितामा गंगोदय माविका योगेश निरौला प्रथम, निकास भुजेल द्वितीय तथा कालिका आविका विशाल श्रेष्ठ तृतीय भएका छन् ।

त्यसैगरी, कक्षा ६–८ स्तरीय हाजिरीजवाफ प्रतियोगितामा गंगोदय मावि प्रथम, देउराली मावि डुम्रेकोट द्वितीय र कालिका आवि तृतीय भएका छन् । माध्यमिक तह (कक्षा ९–१२) स्तरीय अङ्ग्रेजी माध्यम निबन्ध लेखन प्रतियोगितामा देउराली माविका सुबिनबाबु अधिकारी प्रथम, गंगोदय माविका सन्देश राई द्वितीय तथा सुजल चौधरी तृतीय भएका छन् ।

पुरुष अभिभावकबीच आयोजित बासुरीवादन प्रतियोगितामा अम्बरबहादुर गुरुङ प्रथम, तेजबहादुर राई द्वितीय र दानबहादुर खड्का तृतीय भएका छन् । महिला अभिभावकबीच बोतलमा पानी भर्ने प्रतियोगितामा प्रतिज्ञा राई प्रथम, सरिता विक द्वितीय र देवकला राई तृतीय भएकी छिन् । कार्यक्रममा विभिन्न अक्षयकोषमार्फत विद्यार्थीहरूलाई नगद पुरस्कार प्रदान गरिएको थियो । स्व. आङ्काजी गुरुङ अक्षयकोषअन्तर्गत २०८१ सालको एस.ई.ई. परीक्षामा उत्कृष्ट जिपिए ३.२४ ल्याउने राजेश पोखरेल (छात्र) र जिपिए ३.२१ ल्याउने योगमाया गुरुङ (छात्रा) लाई जनही १४ हजार प्रदान गरिएको छ ।

त्यसैगरी, स्व. भरसबहादुर तथा नरमाया गुरुङ अक्षयकोषअन्तर्गत कक्षा–८ मा उत्कृष्ट जिपिए ल्याउने सबिन पाण्डे र लक्ष्मी भुजेललाई जनही रु. ६ हजार प्रदान गरिएको थियो । स्व. हितावी शिक्षा स्मृति प्रतिष्ठान अक्षयकोषअन्तर्गत कक्षा–८ का विपन्न विद्यार्थी सुगम खड्का र रोजिना विकलाई जनही ८ हजार ७ सय प्रदान गरिएको छ ।

त्यस्तै, स्व. शोभा रेग्मी अक्षयकोषअन्तर्गत कक्षा–७ मा उत्कृष्ट नतिजा ल्याउने विपन राईलाई रु. ८ हजार ५ सय प्रदान गरी पुरस्कृत गरिएको थियो । कार्यक्रमको अवसरमा सोही विद्यालयका शिक्षक प्रेम श्रेष्ठले विद्यालयलाई एक थान पोडियम सौजन्य प्रदान गर्नुभएको थियो ।