फागुन २१ को निर्वाचनमा देश बचाउने आधारमा मतदान गर्न विश्वप्रकाश शर्माको आह्वान

फागुन ८, सोलुखुम्बु । नेपाली काँग्रेसका उपसभापति विश्वप्रकाश शर्माले आगामी फागुन २१ गते हुने प्रतिनिधि सभा सदस्य निर्वाचनमा “चुनाव कस्ले जित्ने होइन, देश कस्ले बचाउने” भन्ने आधारमा मतदान गर्न मतदातालाई आग्रह गर्नुभएको छ । शुक्रबार सोताङ गाउँपालिकास्थित शिवटार बजारमा आयोजित घरदैलो कार्यक्रममा बोल्दै उहाँले यस्तो बताउनुभएको हो ।

सगरमाथाको जिल्ला सोलुखुम्बु देशकै गौरव भएको उल्लेख गर्दै उहाँले अबको निर्वाचनपछि मुलुकलाई सही दिशातर्फ अघि बढाउनुपर्नेमा जोड दिनुभयो । उहाँले सोलुखुम्बुबाट उम्मेद्वार प्रकाश सिंह कार्की निर्वाचित भएमा सोताङमा बजेट अभावका कारण रोकिएको खानेपानी आयोजना तथा सडक निर्माणलाई पहिलो प्राथमिकतामा राखिने प्रतिबद्धता व्यक्त गर्नुभयो । कार्यक्रममा नेपाली काँग्रेस सोलुखुम्बुका तर्फबाट प्रतिनिधि सभा सदस्यका उम्मेदवार प्रकाश सिंह कार्कीले जिल्लाका विभिन्न स्थानीय तहमा घरदैलो अभियानलाई तीव्रता दिइरहनुभएको छ ।

नेपाल सगरमाथाको देश भएकाले निर्वाचनपछि देश कुन दिशातर्फ अघि बढ्ने भन्ने विषयमा कांग्रेस स्पष्ट दृष्टिकोणका साथ अघि बढिरहेको उहाँको भनाइ थियो । सबै जातजाति र समुदायलाई सम्मान गर्ने पार्टी कांग्रेस भएको उल्लेख गर्दै “सयौं थुँगा फूलका हामी” भन्ने राष्ट्रिय भावनाअनुसार सबैलाई समेट्दै अघि बढ्ने प्रतिबद्धता व्यक्त गर्नुभयो । घरदैलो कार्यक्रममा स्थानीय नेता, कार्यकर्ता तथा सर्वसाधारणको उल्लेख्य सहभागिता रहेको थियो ।