सोलुखुम्बुमा नमुना मतदान अभ्यास सम्पन्न

फागुन ८, सोलुखुम्बु । सोलुखुम्बुमा आउँदो फागुन २१ गते हुने निर्वाचनलाई लक्षित गर्दै नमुना मतदान अभ्यास सम्पन्न गरिएको छ। शुक्रबार जिल्ला निर्वाचन कार्यालय, जिल्ला प्रशासन कार्यालय र मुख्य निर्वाचन अधिकृतको कार्यालयको संयुक्त आयोजनामा उक्त अभ्यास सञ्चालन गरिएको हो। नमुना मतदानका क्रममा मतदाताले प्रत्यक्ष तथा समानुपातिक दुवै तर्फ मतदान गर्ने अभ्यास गरेका थिए।

साथै अपाङ्गता भएका व्यक्ति र ज्येष्ठ नागरिकलाई मतदानमा कसरी सहजीकरण गर्ने, मतदानका क्रममा हुन सक्ने विवादलाई कसरी समाधान गर्ने लगायत विषयमा समेत व्यवहारिक अभ्यास गराइएको थियो। जिल्ला प्रहरी कार्यालय सोलुखुम्बुका सूचना अधिकारी विकास राईका अनुसार नमुना मतदानमा मतदाता व्यवस्थापन, प्रहरी परिचालन, राजनीतिक दलका प्रतिनिधिको समन्वय तथा निर्वाचन कर्मचारी परिचालन सम्बन्धी अभ्याससमेत गरिएको थियो।

कार्यक्रममा मुख्य निर्वाचन अधिकृत चन्द्र कुमार पोखरेल, प्रमुख जिल्ला अधिकारी लिला कुमारी के.सी. पाण्डे, प्रहरी नायव उपरीक्षक मनोजित कुँवर लगायत जिल्ला सुरक्षा समितिका पदाधिकारीहरुको उपस्थिति रहेको थियो। त्यसैगरी नेपाली सेना, नेपाल प्रहरी र शसस्त्र प्रहरी बल, नेपालका प्रतिनिधिहरू तथा निर्वाचन सुरक्षामा खटिने प्रहरी कर्मचारीहरुको समेत सहभागिता रहेको थियो। अभ्यासका क्रममा मतदानस्थलमा हुन सक्ने सम्भावित घटनाहरू र त्यसको नियन्त्रणका लागि सबै सुरक्षा निकायले संयुक्त रूपमा कसरी कारबाही गर्ने भन्ने विषयमा समेत तयारी अभ्यास गरिएको जनाइएको छ।