सोलुका उम्मेद्वार भोट माग्न गाउँ गाउँमा, एजेण्डा र भिजनमा प्रतिष्पर्धा

फागुन ९, साेलुखुम्बु । प्रतिनिधि सभा सदस्य निर्वाचनमा मत हाल्ने दिन आउन १३ दिन बाँकी छ । आसन्न र्निाचनमा मत आफ्नो पक्षमा पार्नका लागी सोलुखुम्बुका उम्मेदवारहरूको दौडधुप पनि हेर्न लायक छ । यहाँ रहेका १२ जना उम्मेदवारहरू आफ्नो जित सुनिश्चित गर्न लागी परेका छन् । उम्मेदवारहरू उम्मेद्वारी दर्ता गरेपछि जिल्ला सदरमुकाममा विरलै भेटिने गरेका छन् । हिमाली जिल्ला चिसो मौसम समेत नभनी उम्मेदवारहरू आफ्ना एजेण्डा र भावी योजना सुनाउँदै उपाल्लो सोलु खुम्बु देखी तल्लो सोलु नेचासल्यान, लिखुपिके सम्म पुगिरहेका छन् ।

यस क्रममा उम्मेदवारहरूले आफ्ना मतदाता सँग शिक्षा, स्वास्थ्य, रोजगारी, पर्यटन, भौतिक पूर्वाधार विकास सँग सम्बन्धित सबैखाले बाचा र प्रतिज्ञाहरू पनि गरिरहेका छन् । विगतका निर्वाचनहरूमा यहाँका हेविवेटहरु भिड्ने भएकाले चुनाव निकै रोचक हुने गरेको भएपनि यस निर्वाचनमा सबै नयाँ अनुसार प्राय भएकाले नागरिकले उम्मेदवारहरूलाई हेर्ने नजर र चुनावी माहौल औसत रहँदै आएको छ । भोट माग्नका लागी गाउँ पसेका उम्मेदवारहरूले विशेष गरि जिल्लामा पर्यटनको सम्भावना उजागर गरि विकास गर्न सकिने बताइरहेका छन् भने प्राकृतिक श्रोत र साधनको सदुपयोग गरेर आर्थिक क्रान्ति गर्न सकिने पनि घोषणा पत्रमा भनिरहेका छन् ।

माहौल प्रदर्शन का लागी नेपाली काङ्ग्रेसका उम्मेद्वार प्रकाशसिंह कार्कीले पार्टीका उपसभापति विश्वप्रकाश शर्मालाई सोताङमा झिकाएका थिए भने अन्य पार्टीहरूले पनि चर्चित अनुहारहरुलाइ ल्याउने तर्जुमा गरिरहेका छन् । राष्ट्रिय स्वतन्त्र पार्टीले आफ्ना बरिष्ठ नेता बालेन्द्र साहलाई ल्याउने तयारी गरेको भएपनि उक्त कार्यक्रम बीचमै रोकेको छ ।

यता नेकपा एमालेका उम्मेदवारहरू माथिल्लो सोलुको घरदैलो सकेर तल्लो क्षेत्र केन्द्रित भएको जिल्ला अध्यक्ष डुफ कुमार बास्तोलाले बताउनुभयो । सोलुखुम्बुको विकासलाई नीतिगत रूपमै दस्तावेजीकरण गर्दै क्रमशः विकास गर्ने भन्दै काङ्ग्रेसका प्रकाशसिंह कार्की मैदानमा छन् । देश बनाउने गरि नयाँ अनुहार लिएर आएको भन्दै रास्वपाका ऋषिधन थुलुङ्ग फिल्डमा छन् भने पालिका अध्यक्षबाट राजिनामा दिएर संसद भवन ताकेका नेकपाका असि राई बदलेर सोलुखुम्बु हर्ने दाउमा छन् ।