सोलुखुम्बुमा सवारी दुर्घटनाको दर बढेपछि चालकसँग ट्राफिकको अन्तरकृया 

फागुन ११, सोलुखुम्बु । हिमाली जिल्ला सोलुखुम्बुमा सवारी दुर्घटना बढेपछी ट्राफिक प्रहरीले चालकहरुलाई सचेतनात्मक अन्तरकृया गरेको छ ।  जिल्ला प्रहरी कार्यालय सोलुखुम्बु र ट्राफिक प्रहरी कार्यालय सोलुखुम्बुको आयोजनामा सोलुखुम्बु भित्र सवारी चलाउने वा जिल्लालाइ केन्द्रमा राखेर यातायात सेवा सञ्चालन गर्ने चालकहरुलाई राखेर अन्तरकृया गरिएको हो । अन्तरकृया कार्यक्रममा ट्राफिक प्रहरीले दुर्घटना न्युनिकरणका लागी चालकहरूलाई ट्राफिक नियम, सडक सङ्केतहरूको अर्थ र आपतकालीन अवस्थामा अपनाउनुपर्ने सुरक्षात्मक उपायहरूका बारेमा अन्तरकृया गराएको थियाे।

 प्रहरीले ४० जना चालकहरुलाई अन्तरकृया गराएको हो । अन्तरकृया कार्यक्रम जिल्ला प्रहरी कार्यालय सोलुखुम्बुका लोक बहादुर दियालीको अध्यक्षतामा सम्पन्न भएको थियो । चालकवर्गलाई ट्राफिक प्रहरी कार्यालय सोलुखुम्बुका सूचना अधिकारी एवं प्रहरी सहायक हवलदार चन्द्र बहादुर बस्नेतले प्रशिक्षण गर्नुभएको थियो । प्रशिक्षणमा प्रहरीले सडकको अवस्थाका कारण हुन सक्ने दुर्घटना, मापसे गरी सवारी चलाउने प्रवृत्ति, र प्राविधिक अवस्था दुरुस्त नभएका सवारी साधनका कारण दुर्घटना बढ्दै गएको तर्फ सचेत गराउँदै चालकहरूलाई संयमित भएर सवारी चलाउन आग्रह गरिएकाे ट्राफिक प्रहरी सहायक हवल्दार बस्नेतकाे भनाइ छ ।  यस वर्ष सोलुखुम्बुमा बढेको सवारी दुर्घटनाको दरका कारण पनि अन्तरकृया आवश्यक ठानिएको हाे  ।

जिल्लामा गत वर्ष  ३४ वटा दुर्घटना प्रहरीको रेकर्डमा भएको भएपनि यस अार्थीक वर्षको ६ महिनामै त्यसको झण्डै दोब्बर करिव ५५ वटा दुर्घटना भइसकेकोले अन्तरकृया आवश्यक ठानिएको उहाँको भनाई छ ।