सोलुखुम्बुमा सञ्चारकर्मीसँग मतदाता शिक्षा एवं निर्वाचन प्रचारप्रसार सम्बन्धी अन्तरक्रिया

सबिना राई, फागुन १२, सोलुखुम्बु । जिल्ला निर्वाचन कार्यालय सोलुखुम्बुले प्रतिनिधि सभा सदस्य निर्वाचनलाई लक्षित गर्दै मतदाता शिक्षा तथा निर्वाचन प्रचारप्रसार प्रभावकारी बनाउन जिल्लाका क्रियाशील सञ्चारकर्मीसँग छलफल एवं अन्तरक्रिया गरेको छ । मंगलबार आयोजित कार्यक्रममा कार्यालयका निर्वाचन अधिकृत दिपेन्द्र राज अधिकारीले निष्पक्ष, शान्तिपूर्ण र भयरहित वातावरणमा निर्वाचन सम्पन्न गर्न सञ्चार क्षेत्रको महत्वपूर्ण भूमिका रहने बताउँदै समन्वय र सहकार्यका लागि आग्रह गर्नुभयो ।

उहाँले हालसम्म सम्पन्न भएका निर्वाचन तयारीका गतिविधि तथा आगामी योजनाबारे जानकारी गराउँदै मतदाता शिक्षालाई प्रभावकारी बनाउन सञ्चारमाध्यमहरूको सक्रिय भूमिका आवश्यक रहेको उल्लेख गर्नुभयो । अधिकृत अधिकारीले बदर मत घटाउने, राजनीतिक दलहरूलाई सचेत गराउने, मतदान अधिकृत तथा निर्वाचनमा खटिने कर्मचारीहरूलाई निष्पक्ष बनाउन सहयोग पु¥याउने, आचारसंहिता पालना गराउने, भयरहित वातावरण निर्माण गर्ने तथा त्रास फैलन नदिन सञ्चारमाध्यमहरूले खेल्ने भूमिकाबारे प्रकाश पार्नुभयो ।

निर्वाचनका लागि आवश्यक व्यवस्थापन तथा सुरक्षा तयारी पूरा गरिएको पनि उहाँले जानकारी दिनुभयो । कार्यक्रममा सहभागी जिल्लाका पत्रकारहरूले निर्वाचन सम्बन्धी सूचना प्रवाहमा स्थानीय सञ्चारमाध्यमलाई प्राथमिकता दिनुपर्ने माग राखेका थिए । उनीहरूले केन्द्रीय स्तरका सञ्चारमाध्यम वा सरकारी रेडियोलाई मात्र प्राथमिकता दिँदा दुर्गम जिल्लाका नागरिकहरू सूचना पहुँचबाट वञ्चित हुने उल्लेख गर्दै जिल्ला स्तरीय सञ्चारमाध्यमसँग सहकार्य बढाउन आग्रह गरेका छन् ।

सञ्चारकर्मीहरूको माग जायज रहेको स्वीकार गर्दै निर्वाचन अधिकृत अधिकारीले उक्त विषय सरकारसमक्ष पुर्याउने प्रतिबद्धता व्यक्त गर्नुभयो । सहभागीहरूले आगामी निर्वाचनहरूमा जिल्ला जिल्लाका सञ्चारमाध्यमसँग सहकार्य गरे निर्वाचन प्रक्रिया अझ प्रभावकारी र समावेशी बन्ने सुझाव दिएका छन् ।