मर्यादा विपरीत निर्वाचनमा खटाइएपछि मोलुङ र सुनकोशीका कर्मचारी असन्तुष्ट 

फागुन १२, सोलुखुम्बु । प्रतिनिधिसभा सदस्य निर्वाचनमा खटिएका ओखलढुङ्गाका मोलुङ र सुनकोसी गाउँपालिकाका ८ जना कर्मचारीहरुले पदीय मर्यादा कायम नगरिएको भन्दै निर्वाचन वापत पाउने कुनै पनि आर्थिक सुविधा नलिने बताएका छन् । मुख्य निर्वाचन अधिकृतको कार्यालयले कर्मचारी खटाउँदा पदीय मर्यादा विपरीत विभेद गरेर खटाएको भन्दै उनीहरुले आर्थिक सुविधा नलिने भएका हुन् ।

आज ओखलढुंगाका प्रमुख जिल्ला अधिकारी मेखबहादुर मंग्रातीमार्फत संयुक्त विज्ञप्ति बुझाउँदै निर्वाचनलाई सघाउने तर आर्थिक सुविधा नलिने उनीहरुको भनाई थियो । पदीय मर्यादाको विषयमा मुख्य निर्वाचन अधिकृतको कार्यालयमा छलफल भए पनि समग्र कर्मचारीहरूको पदीय मर्यादा सच्याउन नसकिने मौखिक जवाफ पाएपछि उनीहरूले संयुक्त विज्ञप्तिमार्फत आफ्नो धारणा सार्वजनिक गरेको बताएका हुन् । मुख्य निर्वाचन अधिकृतको कार्यालयले आइतबार जिल्लाका १ सय ५७ मतदान केन्द्रका लागि खटिने ९ सय ३२ कर्मचारीको नामावली प्रकाशन गरेको थियो ।