फेक रेस्क्युको धन्धा चौपट बनाउँदै सिआइवि, फेरी २ जना पक्राउ

फागुन १३, सोलुखुम्बु । क्षेत्रमा पदयात्रामा जाने विदेशी पर्यटकको नक्कली उद्धार (फेक रेस्क्यु) गरी करोडौँ रुपैयाँ बीमा रकम ठगी गर्ने कार्यमा संलग्न थप दुई जनालाई प्रहरीको केन्द्रीय अनुसन्धान ब्यूरो (सीआईबी) ले पक्राउ गरेको छ । पक्राउ पर्नेहरूमा रोयल होलिडेज एडभेन्चरका सञ्चालक सन्दीप तिवारी र विमान सेवा सञ्चालक संघका पूर्व उपाध्यक्ष राजेन्द्रबहादुर सिंह रहेका छन् । ब्यूरोले उनीहरूलाई क्रमशः फागुन १२ र १३ गते काठमाडौँबाट नियन्त्रणमा लिएको हो ।

यो गिरोहले उच्च हिमाली क्षेत्रमा सामान्य बिरामी भएका वा बिरामी नै नभएका पर्यटकलाई हेलिकप्टरमार्फत उद्धार गरेको नक्कली कागजात बनाएर अन्तर्राष्ट्रिय बीमा कम्पनीहरूबाट ठूलो रकम दाबी गर्ने गरेको पाइएको छ । अनुसन्धानका क्रममा माउन्टेन रेस्क्यु सर्भिस, एभरेष्ट एक्सपिरियन्स एण्ड असिस्टेन्स जस्ता कम्पनीले सरकारी अभिलेख र विमानस्थलको प्यासेन्जर म्यानिफेस्ट नै किर्ते गरी नक्कली बिल तयार पार्ने गरेको खुलेको छ । काठमाडौँका विभिन्न अस्पतालसँगको मिलोमतोमा पर्यटक भर्ना भएको र उपचार गरिएको झुटा मेडिकल रिपोर्ट समेत बनाउने गरिएको ब्यूरोले जनाएको छ । यस प्रकारको संगठित ठगीले अन्तर्राष्ट्रिय जगतमा नेपालको पर्यटन क्षेत्रको छवि नराम्रोसँग धमिलिएको छ ।

विदेशी सञ्चार माध्यमहरूले नेपाललाई पर्यटकीय गन्तव्यको सूचीबाट हटाउनुपर्ने र सगरमाथाको फेदमा ठगी भइरहेको भन्दै समाचार सम्प्रेषण गरेपछि नेपालको राष्ट्रिय स्वाभिमान र प्रतिष्ठामा आँच आएको प्रहरीको ठहर छ । यसैलाई मध्यनजर गर्दै प्रहरीले उनीहरूमाथि मुलुकी अपराध संहिता २०७४ बमोजिम ‘राष्ट्रहित प्रतिकूल काम गर्न नहुने’ कसूर र संगठित अपराध निवारण ऐन अन्तर्गत अनुसन्धान अगाडि बढाएको छ ।

हालसम्म यो ठगी प्रकरणमा ट्रेकिङ कम्पनी, रेस्क्यु कम्पनी, अस्पतालका प्रतिनिधि र हेलिकप्टर कम्पनीका शेयरधनीसहित कुल ९ जना पक्राउ परिसकेका छन् । पक्राउ परेका ५६ वर्षीय सिंह र २८ वर्षीय तिवारीलाई काठमाडौँ जिल्ला अदालतबाट अनुमति लिई हिरासतमा राखिएको छ । पर्यटन क्षेत्रको यो ठूलो घोटालाका अन्य आरोपितहरूको पनि खोजी भइरहेको ब्यूरोका प्रवक्ता प्रहरी वरिष्ठ उपरीक्षक शिवकुमार श्रेष्ठले जानकारी दिएका छन् ।