फागुन १३, सोलुखुम्बु । पत्रकार आचारसंहिता तथा निर्वाचन आचारसंहितासम्बन्धी सोलुखुम्बुस्थित क्रियाशील पत्रकारहरूका लागि एकदिने अभिमुखीकरण कार्यक्रम सम्पन्न भएको । नेपाल पत्रकार महासङ्घ सोलुखुम्बुको आयोजना तथा नेपाल पत्रकार महासङ्घ कोशी प्रदेशको सहकार्यमा कार्यक्रम सम्पन्न भएको हो ।
अभिमुखीकरण कार्यक्रममा प्रतिनिधिसभा सदस्य निर्वाचन २०८२ सन्दर्भमा आचारसंहितासम्बन्धी व्यवस्था, सत्य–तथ्य र निष्पक्षता, पत्रकारिताको प्रतिबद्धता तथा आचारसंहिता पालना गर्नुपर्ने संस्था, निकाय र अधिकारीहरूका विषयमा जिल्ला निर्वाचन कार्यालय सोलुखुम्बुका निर्वाचन अधिकृत दिपेन्द्रराज अधिकारीले सहजीकरण गर्नुभएको थियो ।
यस जिल्लामा कुल ८५ हजार ५ सय १५ जना मतदाता रहेका छन् । निर्वाचनका लागि जिल्लाभर १ सय २४ वटा मतदान स्थल र १ सय ३९ वटा मतदान केन्द्रबाट मतदान गर्न सक्ने व्यवस्था मिलाइएको जिल्ला निर्वाचन अधिकृत अधिकारीले जानकारी दिनुभयो । मतपेटिकामा मतपत्रबाहेक अन्य सामग्री राख्न नपाइने, मत सङ्केत गरिसकेपछि अरूलाई देखाउन वा सुनाउन नपाइने तथा मतदान प्रक्रियामा गोपनीयता कायम गर्नुपर्ने विषयमा जानकारी गराइएको थियो ।
सञ्चारकर्मीहरूले समाचार सम्प्रेषण गर्दा मिथ्या सूचना वा दुष्प्रचार गर्न नहुने विषयमा समेत छलफल गरिएको थियो । कार्यक्रममा निर्वाचन कार्यालय सोलुखुम्बुका अध्यक्ष सुवास दर्नाल तथा जिल्लास्थित क्रियाशील पत्रकारहरूको उपस्थिति रहेको थियो । समाचार लेख
Discussion about this post