सोलुखुम्बुमा ८४ जना मतदान अधिकृत तथा सहायक अधिकृतलाई अभिमुखीकरण

सबिना राई, फागुन १४, सोलुखुम्बु । फागुन २१ गते हुने प्रतिनिधिसभा सदस्य निर्वाचनको तयारीस्वरूप सोलुखुम्बुमा खटाइने मतदान अधिकृत तथा सहायक मतदान अधिकृतलाई अभिमुखीकरण तालिम प्रदान गरिएको छ । सदरमुकामस्थित जनजागृती माध्यमिक विद्यालयमा आयोजित तालिमको पहिलो दिन ४२ जना मतदान अधिकृत र ४२ जना सहायक मतदान अधिकृतलाई प्रशिक्षण दिइएको हो ।

तालिममा निर्वाचन प्रक्रिया, आचारसंहिता, मतपत्र व्यवस्थापन, मतगणना प्रक्रिया तथा आफ्नो जिम्मेवारीसम्बन्धी विषयमा विस्तृत जानकारी गराइएको जिल्ला निर्वाचन कार्यालय सोलुखुम्बुका सूचना अधिकारी नेत्र घिमिरेले जानकारी दिनुभयो ।

पहिलो दिन खुम्बु पासाङल्हामु गाउँपालिका, महाकुलुङ गाउँपालिका र माप्य दुधकोशी गाउँपालिकाका मतदान अधिकृत तथा सहायकलाई तालिम प्रदान गरिएको थियो । सूचना अधिकारी घिमिरेका अनुसार फागुन १५ गते लिखुपिके गाउँपालिका, थुलुङ दुधकोशी गाउँपालिका र सोताङ गाउँपालिकाका अधिकृतहरूलाई तथा फागुन १६ गते सोलुदुधकुण्ड नगरपालिका, नेचासल्यान गाउँपालिका र कारागारका मतदान अधिकृत तथा सहायकलाई तालिम दिइने कार्यक्रम रहेको छ।

तालिमको सहजिकरण मुख्य निर्वाचन अधिकृत चन्द्रकुमार पोखरेल, प्रमुख जिल्ला अधिकारी लिला कुमारी के.सी. पाण्डे तथा जिल्ला निर्वाचन अधिकारी दिपेन्द्र राज अधिकारीले गरिरहनुभएको छ। जिल्लामा कुल ८५ हजार ५ सय १५ जना मतदाता रहेका छन्। निर्वाचनका लागि जिल्लाभर १ सय २४ वटा मतदान स्थल र १ सय ३९ वटा मतदान केन्द्र तोकिएको छ। प्रतिनिधिसभातर्फ एक मात्र निर्वाचन क्षेत्र रहेको सोलुखुम्बुमा आगामी फागुन २१ गते मतदान सम्पन्न हुने छ ।