चैत्र २, सोलुखुम्बु । विश्वराज पोखरेलले आफ्नो चुनावी खर्च विवरण सार्वजनिक गर्नुभएको छ। राष्ट्रिय स्वतन्त्र पार्टीका तर्फबाट प्रतिनिधिसभा सदस्यका लागि ओखलढुंगा निर्वाचन क्षेत्र नम्बर १ बाट विजयी भएका पोखरेलले निर्वाचन आयोगमा बुझाएको विवरणअनुसार चुनावी अभियानमा कुल १० लाख ३४ हजार ७०० रुपैयाँ खर्च भएको उल्लेख गर्नुभएको छ।
उहाँका अनुसार प्रचार–प्रसार सामग्री छपाइतर्फ १ लाख ९५ हजार रुपैयाँ खर्च गरिएको छ। यस अन्तर्गत वाचापत्र, नमुना मतपत्र, फ्लेक्स, नामावली र ब्यानर छपाइ समावेश छन्। त्यस्तै सवारी साधन तथा इन्धनमा २ लाख ३३ हजार ५०० रुपैयाँ खर्च गरिएको छ भने घरदैलो अभियान, दाना, खाजा तथा बसोबासतर्फ २ लाख ७० हजार २०० रुपैयाँ खर्च भएको विवरणमा उल्लेख छ।
यसैगरी निर्वाचन सम्पर्क कार्यालय व्यवस्थापनमा २० हजार रुपैयाँ, बुथ प्रतिनिधि परिचालनमा १ लाख ५० हजार रुपैयाँ, विद्युतिय प्रचार–प्रसारमा २० हजार रुपैयाँ, कोणसभा, गोष्ठी तथा भेटघाटमा ५० हजार रुपैयाँ, वडास्तरीय प्रचार–प्रसारमा ७५ हजार रुपैयाँ, निर्वाचनसम्बन्धी सामग्री ढुवानीमा २० हजार रुपैयाँ तथा अन्य विविध खर्चमा २० हजार रुपैयाँ खर्च भएको पोखरेलले जानकारी दिनुभएको छ। निर्वाचन आयोगको प्रावधानअनुसार उम्मेदवारहरूले चुनाव सम्पन्न भएपछि आफ्नो चुनावी खर्च विवरण आयोगमा बुझाउनुपर्ने व्यवस्था रहेको छ।
Discussion about this post