तिव्र हावाहुरीबाट सावधानी अपनाउन सोलु प्रहरीको आग्रह

चैत्र ३, सोलुखुम्बु । जिल्ला प्रहरी कार्यालय सोलुखुम्बुले पछिल्ला केही दिनदेखि जिल्लासहित आसपासका क्षेत्रमा तिव्र गतिमा हावाहुरी चलिरहेको भन्दै सर्वसाधारणलाई उच्च सतर्कता अपनाउन आग्रह गरेको छ । प्रहरीका अनुसार हावाहुरीका कारण जनधनको क्षति हुन सक्ने सम्भावना रहेकाले पूर्व तयारी अत्यावश्यक रहेको जनाएको छ। यसका लागि घर वरिपरि रहेका टिन तथा छानालाई मजबुत बनाउने, कमजोर रुख तथा हाँगाहरू हटाउने जस्ता कार्य तत्काल गर्न अनुरोध गरिएको छ।

हावाहुरी चलिरहेको समयमा बाहिर ननिस्कन, झ्याल–ढोका राम्रोसँग बन्द गर्न तथा अनावश्यक रूपमा विद्युत् उपकरण प्रयोग नगर्न पनि प्रहरीको सुझाव छ । साथै रुख, विद्युत् पोल तथा होर्डिङ बोर्डबाट टाढा बस्न, खुला मैदान वा अग्ला स्थानमा नबस्न र सुरक्षित भवनभित्र आश्रय लिन भनिएको छ ।

सवारीसाधन चलाइरहेका चालकलाई पनि विशेष सावधानी अपनाउन आग्रह गर्दै, सम्भव भएसम्म सुरक्षित स्थानमा रोकिन र तिव्र हावाहुरीका बेला लामो दूरीको यात्रा नगर्न अनुरोध गरिएको । प्रहरीले सबैलाई सतर्क रहन र सम्भावित जोखिमबाट जोगिन सचेत रहन अपिल गरेको छ ।