खिजीदेम्बामा चैत्र २८ देखी वृहत सांस्कृतिक महोत्सव हुँदै 

चैत्र ४, सोलुखुम्बु । ओखलढुंगाको खिजिदेम्बा गाउँपालिकामा बृहत सांस्कृतिक महोत्सव हुने भएको छ ।  खिजीदेम्बा गाउँपालिकाको प्रायोजन तथा नेपाल आदिवासी जनजाति महासङ्घ समन्वय परिषद खिजीदेम्बा गाउँपालिकाको संयोजनमा आगामी चैत्र २८ गतेबाट ३ दिने वृहत सांस्कृतिक महोत्सव हुने भएको हो ।

आदिवासी जनजाति समुदायको सांस्कृतिक तथा धार्मिक संस्कार संस्कृति तथा रीतिरिवाजको संरक्षण गर्दे भावी पुस्तामा हस्तान्तरण गर्ने उद्देश्य सहित हरेक वर्ष आयोजना हुँदै आएको महोत्सवले यस वर्ष पनि निरन्तरता पाउने भएको हो ।  बहुजातीय, भाषा, संस्कार, संस्कृति र विविधता हाम्रो पहिचान, समृद्ध खिजीदेम्बा निर्माण हाम्रो अभियान भन्ने नारा सहित गाउँपालिका केन्द्र खिजीफलाँटेमा साँस्कृतिक कार्यक्रमको आयोजना हुने भएको आयोजकले जनाएको छ ।

महोत्सवमा तामाङ, सुनुवार, शेर्पा, भुजेल, नेवार, गुरुङ लगायतका आदिवासी समुदायका सांस्कृतिक नृत्य तथा झाँकीहरू प्रस्तुत हुने छन ।  महोत्सवमा यि समुदायले आफ्ना नृत्यहरू प्रस्तुत गर्ने आदिवासी जनजाति महासङ्घ समन्वय परिषद खिजिदेम्बाका सचिव कुसाङ शेर्पाले बताउनुभयो ।  महोत्सवमा प्रथम, द्वितीय र तृतीय हुने विजेता टिमले क्रमशः पुरस्कार राशि ५१ हजार, २५ हजार र १५ हजारको साथमा प्रमाणपत्र प्राप्त गर्ने उहाँले बताउनुभयो ।