थुलुङ दुधकोशीमा कर्मचारी नभएको विषय ः नियमित बिदामा रहेको कावा अध्यक्ष राईको दावी 

चैत्र ६, सोलुखुम्बु ।  सोलुखुम्बुको थुलुङ दुधकोसी गाउँपालिका दुई दिन देखी ठप्प बनेको भन्ने सामाजिक सञ्जालमा आएको विषय मिथ्या भएको जनाइएको छ ।  विगत केही दिन यता गाउँपालिकाका प्रमुख प्रशासकीय अधिकृत अजम्बर राई सहित अन्य विषयगत शाखाका कर्मचारी नहुँदा सेवा ठप्प भएको विषय बाहिर आएपछि त्यस विषयमा बुझ्दा कर्मचारी बिदामा रहेको जनाइएको हो ।

 गाउँपालिका उपाध्यक्ष एवं कार्यवाहक अध्यक्ष सविता राईले आफू गत २ गते काठमाण्डौ गएको र फर्किँदै गरेको जनाउनुभयो । विषयगत शाखाका कर्मचारी सहित प्रमुख प्रशासकीय अधिकृत नभएको विषय के हो भने सोध्दा उहाँले  सेवा निरन्तर प्रवाह भइरहेको र चुनाव पछि कर्मचारी बिदामा भएको जानकारी दिनुभयो । शनिवार कार्यपालिका बैठक डाकिएकाले सबै कर्मचारी आइपुग्ने र आइतबार देखी नियमित जस्तै सेवा प्रवाह हुने उहाँको भनाई छ ।

 यस्तै गाउँपालिकाको वडा नम्बर १ का अध्यक्ष घनराज सुनुवारले सेवा ठप्प भएको विषय आफ्नो जानकारीमा नभएको बताउनुभयो ।  यद्यपि कर्मचारीहरूसँग यस विषयमा जानकारी लिने कोशिश गर्दा प्रमुख प्रशासकीय अधिकृत सहितका केही कर्मचारीको मोबाइल स्वीच्ड अफ आएको छ भने केहीको सम्पर्क हुन नसकेको सत्य हो ।