थुलुङ दुधकोशीको विज्ञप्ति ः पालिकाकै कामका लागी काठमाण्डौ गएका बेला भ्रम फैलाइएको दावी 

चैत्र ८, सोलुखुम्बु । सोलुखुम्बुको थुलुङ दुधकोशी गाउँपालिकामा कर्मचारी नभएको विषयमा गाउँपालिकाले विज्ञप्ति सार्वजनिक गरेको छ ।  गत चैत्र ५ र ६ गते २ दिन गाउँपालिका कर्मचारी विहीन भएको भन्दै सामाजिक सञ्जालमा व्यापक चर्चा सुरु भएपछि गाउँपालिकाले शनिवार एक विज्ञप्ति जारी गर्दै ध्यानाकर्षण भएको जनाएको छ ।

 गाउँपालिका प्रवक्ता भोजराज कार्कीले एक विज्ञप्ति मार्फत गाउँपालिकामा प्रमुख प्रशासकीय अधिकृत सहितका कर्मचारी नभएको भन्ने विषय सत्य भएको बताउँदै खास कारण फोन मार्फत अपरिचित व्यक्तिले धम्की दिएको कारण भनिएको भएपनि कर्मचारीहरू नियमित कामको लागी काठमाण्डौ गएको बताउनुभएको हो ।  

विज्ञप्ति मार्फत उहाँले धाक धम्की गर्ने व्यक्तिहरू र कर्मचारी बीच आपसी सहमति भएर नियमित सेवा प्रवाह भइरहेको भन्दै सामाजिक सञ्जालमा आएको विषयमा सत्यता नभएको गाउँपालिकाले विज्ञप्ति मार्फत भनेकाे छ ।  गाउँपालिकामा प्रमुख प्रशासकीय अधिकृत सहित लेखा अधिकृत, प्राविधिक शाखाका कर्मचारी सबै कामको सिलसिलामा काठमाण्डौ भएको बेला कार्यालयमा भिडियो खिचेर प्रसारण गरिएको गाउँपालिकाको भनाई छ ।