सोलुखुम्बुमा ६ वर्षमा विपदबाट ठुलो क्षति, १२ जनाको मृत्यु

चैत्र १६, सोलुखुम्बु । हिमाली जिल्ला सोलुखुम्बुमा पछिल्लो करिब ६ वर्षको अवधिमा विभिन्न प्रकारका विपद्का कारण मानवीय तथा भौतिक क्षति भएको छ । जिल्ला प्रहरी कार्यालय सोलुखुम्बुको तथ्याङ्क अनुसार जिल्लामा आर्थिक वर्ष २०७७÷०७८ देखि २०८२÷०८३ हालसम्म विपद्का कारण १२ जनाको ज्यान गएको छ भने ४७ जना घाइते भएका छन् । प्रहरीका अनुसार सो अवधिमा ७४ वटा पशुचौपाया र ३७ वटा पशुपन्छी मरेका छन् ।

त्यस्तै, ७४५ वटा भौतिक संरचनामा क्षति पुगेको छ । कुल क्षतिको अनुमानित मूल्य ४० करोड ३१ लाख ५५ हजार २ सय ५० रुपैयाँ रहेको छ । जिल्ला प्रहरी कार्यालय सोलुखुम्बुका सूचना अधिकारी विकास राईका अनुसार जिल्लामा आगलागी, पहिरो, जंगली जनावरको आक्रमण, चट्याङ, हावाहुरी तथा भूकम्पजस्ता विभिन्न विपद्का घटनाबाट क्षतिहरू भएका हुन् । विपद्का घटनाहरू वर्षेनी दोहोरिने क्रम जारी रहेको भन्दै मानव जीवनसँगै आर्थिक क्षेत्रलाई समेत गम्भीर असर पारिरहेको उहाँको भनाई छ ।

प्रहरीले जोखिम न्यूनीकरणका लागि सचेतना अभिवृद्धि, पूर्वतयारी तथा स्थानीय तहसँग समन्वय गरी काम भइरहेको जनाएको छ । साथै, विपद्का बेला छिटो उद्धार तथा राहतका लागि तयारी अवस्थामा रहने पनि कार्यालयले जनाएको छ । स्थानीयवासीहरूले भने विपद् जोखिम कम गर्न दीर्घकालीन योजना र पूर्वाधार विकासमा ध्यान दिनुपर्ने बताएका छन् ।